Home NATIONWIDE Tech-Voc program sa SHS grads, rerepasuhin sa Senado

Tech-Voc program sa SHS grads, rerepasuhin sa Senado

MANILA, Philippines – Iparerepaso ni Senador Sherwin Gatchalian ang pagpapatupad ng Free Senior High School Assessment and Certification Support Program para sa mga mag-aaral ng technical-vocational-livelihood (TVL).

Sa pahayag, sinabi ni Gatchalian na layunin ng programa na pataasin ang tsansa ng TVL graduates ng senior high school na makakuha ng magandang trabaho.

Sa paghahain ng Proposed Senate Resolution No. 935, idiniin ni Gatchalian ang pangangailangan na suriin ang kahandaan ng Department of Education (DepEd) at Technical Education and Skills Development Authority (TESDA) na ipatupad ang programa.

Sa deliberasyon ng 2024 national budget, itinulak ni Gatchalian ang paglalaan ng pondo sa libreng certification ng mag-aaral ng senior high school sa ilalim ng TVL track.

Nakatakda sa 2024 General Appropriations Act (GAA), P438.16 milyon ang inilaan sa pondo ng TESDA Regulatory Program para sa assessment at paggawad ng National Certification (NC) sa mag-aaral ng TVL sa senior high school.

Tinatayang 420,900 Grade 12 TVL graduates ang sasaklawin ng naturang pondo.

Ipinanukala ni Gatchalian na pondohan ang assessment at certification ng mga senior high school graduates sa TVL track dahil sa mababang certification rates na naitala noong School Year (SY) 2019-2020 (25.7%) at 2020-2021 (6.8%).

Lumalabas na mababa ang certification rate dahil hindi kayang tustusan ng karamihan sa mga mag-aaral ang NC assessment na umaabot sa humigit-kumulang P1,009.29 kada isang estudyante.

Bagama’t mababa ang certification rates, umabot naman sa 98% ang passing rates ng mga kumuha ng assessment noong SY 2019-2020 at 97% naman para sa SY 2020-2021.

“Isinulong nating pondohan ang certification ng ating mga senior high school graduates sa TVL track upang tumaas ang posibilidad na makakuha sila ng maayos na trabaho.

Nais nating tiyakin na magagamit nang tama ang inilaan nating pondo upang matulungan ang mga Grade 12 TVL graduates,” ani Gatchalian, Chairperson ng Senate Committee on Basic Education.

May P50 milyon ding inilaan sa DepEd sa ilalim ng Teacher Quality and Development Program upang mabigyan ng training at certification ang mga senior high school teachers sa pamamagitan ng TESDA.

Umaasa si Gatchalian na makatutulong ang certification ng mga Grade 12 graduates sa TVL track upang tugunan ang kawalan nila ng labor market advantage.

Ayon sa isang pag-aaral ng Philippine Institute for Development Studies noong 2020, ang average daily basic pay ng mga senior high school graduates ay P316, mas mataas lamang ng P14 sa mga nakatapos ng Junior High School. Ernie Reyes

Previous articleAnniv celebration ng EDSA People Power, manageable at generally peaceful – PNP
Next articleABC prexy patay sa pamamaril, 2 sugatan