MANILA, Philippines- Nasakote ng pulisya ang isang lalaki na nakalista bilang top 3 most wanted ng Valenzuela City sa isinagawang manhunt operation sa Terminal 2 Ninoy Aquino International Airport, Miyerkules ng umaga.
Kinilala ni Valenzuela police chief P/Col. Salvador Destura Jr. ang naarestong akusado bilang si Tibes Galeno alyas “Totce”, 32, ng Brgy. Concepcion Talisay City Negros Occidental.
Sa kanyang ulat kay Northern Police District (NPD) Director P/BGen Ponce Rogelio Peñones Jr, sinabi Col. Destura, nagsagawa ang mga operatiba ng Station Intelligence Section (SIS) ng Valenzuela police sa pangunguna ni P/Cpt Ronald Sanchez at P/Lt Jaime Abarientos ng manhunt operation kontra wanted persons.
Nadakip ng mga operatiba ng SIS sa nasabing operation ang akusado dakong alas-6:20 ng umaga sa kahabaan ng Terminal 2 Ninoy Aquino International Airport.
Ani Cpt Sanchez, ang akusado ay pinosasan nila sa bisa ng warrant of arrest na inisyu ng Regional Trial Court Branch 270, Valenzuela City noong February 9, 2023, para sa kasong Rape Through Sexual Assault under Art. 266-A Par. 2 of the Revised Penal Code in Relation to Sec 5(b) of R.A. 7610.
Pansamantalang nakapiit ang akusado sa Custodial Facility Unit ng Valenzuela CPS habang hinihintay ang pagpapalabas ng commitment order ng korte. Rene Manahan
