Traysikel vs motor: 5 todas, 5 sugatan sa Palawan

PUERTO PRINCESA CITY — Lima ang patay habang limang iba pa ang sugatan sa sa salpukan ng motorsiklo at traysikel na puno ng pasahero sa national highway ng bayan ng Brooke’s Point, lalawigan ng Palawan noong Sabado ng gabi, ayon sa ulat ng pulisya.

Naganap ang aksidente sa Barangay Malis, dakong alas-7:50 ng gabi, na kinasangkutan ng isang Yamaha motorcycle na minamaneho ni Gabriel Suay, 19, kasama ang back rider na si Jenny Boy Marcos, 20, at isang top-down na tricycle, ayon sa ulat na inilabas kahapon.

Sakay naman sa tricycle ang driver na si Nelio Ame, 23, at mga pasaherong sina Louie Jay Abis, 22; Zera Adonis, 18; Venny Dubria, 28; Rey Jeven Longgageng, 19; Dorothy Joy Vidal; at dalawa pang menor-de-edad na 16 at 17-anyos, pawang residente ng Brooke’s Point.

Sinabi ng mga imbestigador ng Brooke’s Point Police na sina Suay at Marcos ay mula sa Barangay Samariñana at patungo sana sa Barangay Malis habang ang tricycle ay papunta sa Poblacion.

Pagdating sa Barangay Malis, biglang napunta ang motorsiklo sa kabilang linya na humantong sa pagsalpok sa traysikel.

Dadalhin sana sina Suay, Abis, Adonis, at Longgaeng sa Southern Palawan Provincial Hospital sa Brooke’s Point ngunit lahat ay namatay habang sa daan.

Samantala, idineklara ring dead on arrival sa Bataraza District Hospital ang 17-anyos na biktima.

Ang mga sugatang biktima ay patuloy na ginagamot. Nats Taboy