MANILA, Philippines – Inilunsad ng Philippine Postal Corporation (PHLPost) katuwang ang Megaworld Lifesytle Malls ang ‘Pupusuan Kita’ Valentines Day 2023 stamps at greeting cards bilang bahagi na rin ng pagdiriwang ng Araw ng mga Puso ngayong Pebrero 14.
“This season of hearts, the Post Office, together with our Partner Megaworld Lifestyle Malls, will let the public experience how we can better express our love, care and respect for anyone who is important in our life,” ayon kay Assistant Postmaster General for Management Support Services Atty. Benjie Yotoko, sa launching ceremony na isinagawa sa Ponte Lobby Venice Grand Canal sa McKinley Hill, Taguig City.
Ang Post Office ay may satellite office sa Ground floor ng Venice Luxury Residences kung saan maaring makapagpadala ng sulat, pakete at Postal ID ng mabilis.
Sa pagdiriwang ng Valentines Day, sinabi ng PHLPost na ito ang espesyal na araw upang pasalamatan ang mga tao, sinuman sila gaya ng pamilya, kaibigan o special someone.
Ang Valentine’s day stamp at greeting cards ay itinaguyod upang pataasin ang interes ng publiko at bagong henerasyon sa kahalagahan ng sulat sa pagpapahayag ng ating pagmamahal sa ating mga katuwang sa buhay, kaibigan at pamilya.
“The Postage Stamps that we will launch today remind us of our traditions, mixed with cool, witty, and cute hand gestures of Love. Designed by our in-house artist, the vintage charm, simplicity, and color of the block of four cartoon-style stamps complement each other perfectly,” saad ni Yotoko.
Ang mga stamps ay may nakasulat na mga katagang: “Pusong Nagmamahal”, “Pusong para sa Iyo”, “Itong Puso Ko”, at “Ikaw ang Puso Ko.”
Ayon pa sa PHLPost, ang mga Filipino ay sadyang mga romantiko na nahihilig sa pagpapahayag ng kanilang nararamdaman sa isang masayang paraan.
Itinuturing na isa sa pinakahihintay na Philatelic release ang mga selyo para sa Araw ng mga Puso ngayong taon ay idinisenyo ng Post Office in-house graphic artist na si Agnes Rarangol.
Samantala, matatandaang inilunsad na rin ng Post Office Mega Manila Area ang “Pada-LOVE! Magpadala, Kiligin, Ma-in love”, na nag-aalok ng tradisyonal nitong “Singing Kartero package” na nagkakahalaga ng P2,500, kasama ang bouquert ng bulaklak, greeting card at dalawang awitin mula sa mga ‘Singing Karteros’.
Sinabi pa ng PHLPost na ang “Express Pada-LOVE”, na magtatagal hanggang Pebrero 15, ay hindi lamang para sa mga Filipino lover, kundi isang kapana-panabik na paraan rin upang isulong ang kanilang Domestic Express Mail Service (DEMS).
Nag-aalok ang naturang Valentines Day project ng same-day/next-day delivery ng mga bulaklak, tsokolate, cake, stuffed toy, card, at iba pang mga regalo, kasama ang mga serbisyo ng Singing Kartero, para sa mga mahal sa buhay, sa panahon ng isang linggong pagdiriwang ng Araw ng mga Puso .
Para sa iba pang katanungan tungkol sa mga selyo, mangyaring tumawag sa 8527-01-08 o 8527-01-32 o sundan/i-like ang Facebook page https://www.facebook.com/PilipinasPhilately/ para sa mga update. Jocelyn Tabangcura-Domenden
