Vessel test expedition ng BFAR sa N. Samar, nakakuha ng 1.5 tonelada ng tuna

MANILA, Philippines – Nakakuha ng aabot sa 1.5 tonelada ng tuna at iba pang high-value species ang barko na ibinigay ng Bureau of Fisheries and Aquatic Resources (BFAR) sa mga mangingisda sa Northern Samar sa unang paglalayag nito.

Ayon sa ulat ng BFAR nitong Martes, Mayo 23, matagumpay ang kauna-unahang test-fishing mission ng FV/DA-BFAR 2102 steel hulled fish harvester sa Pacific Ocean mula Mayo 15 hanggang 16.

Sa panayam, sinabi ni Dan De San Miguel, BFAR tuna conservation management zone focal person, na sakay ng barko ang mga lokal na mangingisda, lokal na opisyal ng pamahalaan, piling technical staff ng
BFAR central office at Eastern Visayas regional office, at mga tauhan mula sa
BFAR provincial fishery office.

“The expedition evaluated the performance and capabilities of the vessel and assess(ed) the skills of its municipal fisherfolk crew members in the actual operations of the said 50 gross ton fishing vessel within commercial waters. The fishermen’s cooperative will be trained further on how to further improve their fishing activities using the new ship,” ani De San Miguel, na kasama ng mga mangingisda sa ekspedisyon.

Siniguro niya ang sustainability sa operasyon ng barko dahil na rin sa serye ng mga pagsasanay kung paano paganahin ang barko.

Sa pagdating ng barko sa Port of Mapanas sa Northern Samar, tinuruan naman ng lokal na pamahalaan at BFAR ang mga residente ng nasabing bayan sa tamang fish storage at pagbebenta ng mga nahuli.

Samantala, sinabi naman ni Mapanas Mayor Ronn Michael Tejano na kasama rin sa mga naglayag, na masayang bumalik sa bayan nila ang mga sakay ng barko dahil sa nakuhang 1.5 tonelada ng sari-saring isda partikular na ang yellowfin tuna, skipjack tuna, at galunggong.

“With more fish expected to come in and more regular voyages, we are prospecting an increase of needed labor with the local fisherfolk to deal with the demand of work,” ani Tejano.

Matatandaan na ibinigay ng BFAR ang P39 milyon halaga ng barko sa mga miyembro ng
Northern Samar Pacific Towns Fishermen’s Cooperative (NSPTFC) noong Marso.

Ang recipients nito ay mga miyembro mula sa mga bayan ng Laoang, Palapag, Mapanas, Gamay, at Lapinig.

“This will not only provide more employment locally, but will definitely enhance our local economy and provide extra revenue to the local government, which can be used to develop our fishing industry. Our local consumers, particularly the poor, are now enjoying cheaper prices of the fish caught by NSPTFC,” dagdag pa ni Tejano.

Sa ulat, nasa 1,000 mangingisda ng tuna ang nakaasa lamang sa tradisyunal na pamamaraan sa pangingisda upang makahuli ng tuna sa Pacific Ocean.

Dahil sa barkong pangisda, inaasahang tataas ng 5.4% o 180 hanggang 200 metriko tonelada ang magiging produksyon ng tuna sa Northern Samar. RNT/JGC