SA panahong kapos ang maraming Pilipino sa pera, madaling kumagat sa pangakong “0% interest” ng mga online loan apps . Sino ba naman ang tatanggi sa pautang na walang interes, lalo na kung pambayad sa pagkain, gamot, kuryente o matrikula ang kailangan?
Ngunit sa likod ng matatamis na pangako, may ilang nagpapautang na tila may ibang pakay: mang-akit sa promo, saka babawiin sa mga bayaring nakatago sa maliliit na letra.
Walang interes daw, pero bakit kulang ang perang natanggap at buo pa rin ang kailangang bayaran? Ito ang dapat ipaliwanag ng mga online lender sa kanilang mga kliyente.
Halimbawa, umutang ka ng ₱5,000, ngunit ₱3,500 lamang ang aktwal na pumasok sa iyong account dahil sa umano’y processing o service fees. Gayunman, ang buong ₱5,000 ang kailangan mong bayaran. Nasaan ang sinasabing zero interest? Maaaring iba ang tawag sa singil, pero hindi nito nabubura ang katotohanang mas maliit ang perang napunta sa nangutang kaysa sa halagang ipinangakong pautang.
Mas mapanganib ang mga promo na limitado lamang sa ilang araw. Sa unang tingin, walang interes; ngunit kapag hindi nabayaran sa maikling takdang panahon, biglang papasok ang mga penalty at iba pang singil. Ang dating solusyon sa kagipitan ay nagiging bitag na lalong nagpalalalim sa pagkakautang.
Hindi naman lahat ng online lending apps ay mapanlinlang. May mga lehitimong nagpauutang. Ngunit ang paggamit ng mapanlinlang na advertising, pagtatago ng mahahalagang bayarin, at hindi malinaw na pagpapaliwanag sa tunay na halaga ng utang ay hindi dapat palampasin.
Dapat kumilos ang mga kinauukulang ahensya, kabilang ang Securities and Exchange Commission, upang siyasatin ang mga reklamong may kaugnayan sa mapanlinlang na promosyon at hindi makatarungang singil. Dapat ding maging malinaw sa mga mamimili ang aktwal na matatanggap nilang halaga, lahat ng bayarin, kabuuang babayaran at mga parusa sa pagkaantala bago sila pumirma o mag-apply.
Sa mga mangungutang, huwag magpadala sa malalaking titik na “0% INTEREST.” Basahin ang kasunduan, kwentahin ang kabuuang babayaran at tiyaking rehistrado at awtorisado ang nagpauutang.
Ang pautang ay dapat makatulong, hindi maging panibagong pasanin. Kung walang interes nga, pero may tagong singil namang nagpapalaki sa utang, zero interest ba talaga iyon—o zero transparency lamang?
Hindi dapat pagkakitaan ang desperasyon ng mahihirap. Ang perang ipinahiram ay may katumbas na obligasyon, ngunit ang pangakong ginamit upang makuha ang tiwala ng nangungutang ay dapat ding panindigan.
