12 mamahaling sasakyan ni Discaya, natagpuan na ng BOC

IPINAHAYAG ng Bureau of Customs (BOC) na natagpuan na nila ang lahat ng labindalawang mamahaling sasakyan na sakop ng search warrant laban sa St. Gerrard Construction firm ng pamilya Discaya sa Pasig City, matapos na dalawang sasakyan lamang ang unang matagpuan noong Martes ng umaga batay sa kautusan ng korte.

Sinabi ni Customs Commissioner Ariel Nepomuceno nitong Martes ng gabi na pito sa mga sasakyan ang isinuko na sa bureau at nai-secure sa compound ng St. Gerrard Construction General Contractor and Development Corp.

Kabilang dito ang isang Rolls-Royce Cullinan, isang Bentley Bentayga, isang Mercedes-Benz G-500, isang Mercedes AMG G 63, isang Toyota Tundra, isang Toyota Sequoia, at isang Cadillac Escalade.

Batay sa ulat ng BOC, natagpuan noong Martes ng umaga sa parking area ng St. Gerrard ang dalawa sa 12 luxury vehicles na sakop ng search warrant na inisyu ng Regional Trial Court ng Maynila, Branch 18. Ang mga ito ay isang Toyota LC300 3.3 V6 ZX AT SUV 2024 at isang Maserati Levante Modena 2022.

Dahil dalawa lamang ang unang natagpuan, nagbabala si Nepomuceno sa pamilya Discaya na titiyakin ng BOC na pananagutin at paparusahan ang mga nakikisangkot sa pagtatago ng mga mamahaling sasakyan.

“Commissioner Ariel F. Nepomuceno forewarned the Discaya family that the BOC will ensure all vehicles are located without delay. He underscored that any discrepancies uncovered will lead to the full collection of duties and taxes, and that those hiding or abetting the concealment of these cars will be punished to the fullest extent of the law,” ayon sa BOC.

Ayon kay Nepomuceno, ang huling tatlong sasakyan — isang GMC Yukon Denali SUV 2022 at dalawang Lincoln Navigator L 2024 — ay kasalukuyang nasa mga awtorisadong service center para kumpunihin at pagkatapos ay isusuko sa BOC.

Lahat ng 12 sasakyan na na-secure ng Bureau of Customs ay isasailalim sa beripikasyon ng mga rekord ng pag-import upang matukoy ang pagsunod sa mga batas sa customs.

Kung may matukoy na pagkakaiba, isasagawa ang kaukulang pagpapatupad at legal na aksyon alinsunod sa Customs Modernization and Tariff Act (CMTA).

Ang lahat ng nasabing sasakyan ay pormal nang naselyuhan ng Customs at nasa ilalim ng 24-oras na pagbabantay ng mga tauhan ng BOC at Philippine Coast Guard (PCG).

Nagpasalamat si Nepomuceno sa mga sumusunod na ahensya sa kanilang tulong sa pagbawi ng mga sasakyan: ang Land Transportation Office (LTO), ang Philippine National Police (PNP)-Eastern Police District (EPD), ang Highway Patrol Group (HPG), ang Philippine Coast Guard (PCG), at mga opisyal ng Barangay Bambang, Pasig City.