ISLAMABAD — Labindalawang tao ang namatay at 27 ang nasugatan matapos sumabog ang isang suicide bomber sa labas ng korte sa kabisera ng Pakistan nitong Martes, na kauna-unahang atake sa sibilyan sa Islamabad sa nakalipas na sampung taon.
Pinataas nito ang tensyon sa rehiyon, kung saan pinagbintangan ng Pakistan ang karatig na Afghanistan.
“We are in a state of war,” sabi ni Defence Minister Khawaja Muhammad Asif, tinukoy ang atake bilang “a message from Kabul, to which Pakistan has the full power to respond.”
Idinagdag ni Interior Minister Mohsin Naqvi, “We are totally clear that Afghanistan has to stop them. In case of a failure, we have no option but to take care of those terrorists who are attacking our country.”
Ayon sa awtoridad, nakipag-ugnayan ang bomber sa kanyang handlers sa Afghanistan bago sumabog sa harap ng isang police vehicle nang hindi makapasok sa korte. Ipinakita ng mga larawan sa scene ang mga sugatang tao at nasirang sasakyan.
Pinagbintangan ng gobyerno ng Pakistan ang Afghanistan at India na nagbibigay ng kanlungan sa mga militante, na tinanggihan ng parehong Kabul at New Delhi. Ipinahayag ng Taliban administration sa Afghanistan ang “deep sorrow and condemnation” sa insidente.
Nagbabala ang mga analyst na nagpapakita ang atake ng pagbabago tungo sa walang pinipiling karahasan. “They are sending a signal: if there will be strikes in Kabul, Islamabad will not be safe,” sabi ni Abdul Basit ng S. Rajaratnam School of International Studies sa Singapore. RNT
