MANILA, Philippines – Ipinag-utos ni Acting Ombudsman Dante Vargas ang anim na buwang preventive suspension laban sa 16 na tauhan mula sa Department of Public Works and Highways (DPWH) – Bulacan 1st District Engineering Office kasabay ng isyu ng korapsyon sa flood control projects.
Ayon sa Office of the Ombudsman, ang preventive suspension ay epektibo simula Huwebes, Setyembre 18.
Ang suspensyon ay kasunod ng paghahain ni DPWH Secretary Vince Dizon ng criminal complaints laban sa ilang tauhan ng ahensya noong Lunes.
Sa memorandum na may petsang Setyembre 19, ipinag-utos ni Dizon ang agarang implementasyon ng desisyon ng Ombudsman.
Kabilang sa mga sinuspinde ay ang mga pinuno at officers-in-charge ng Construction Section, Planning and Design Section, Maintenance Section, Quality Section, Maintenance Section, Administrative Section, Budget Unit, Procurement Unit, cashier, project engineers, at engineer.
Hindi naman kabilang sa preventive suspension sina dating Bulacan 1st disrict engineer Henry Alcantara, assistant district engineer Brice Ericson Hernandez, Construction Section chief Jaypee Mendoza, at chief accountant Juanito Mendoza dahil tinanggal na sila sa serbisyo.
Nauna nang sinabi ni Dizon na target ng ahensya na maghain ng isa o higit pang corruption cases kada linggo kasabay ng pagpapaigting ng Independent Commission for Infrastructure (ICI) ng imbestigasyon nito sa maanomalyang flood control projects.
Samantala, inendorso ni Commission on Audit Chairperson Gamaliel Cordoba ang karagdagang fraud audit reports na may kaugnayan sa flood control projects na matatagpuan sa munisipalidad ng Plaridel, Pandi, at Bocaue sa Bulacan.
Ang mga flood control projects na kinikwestyon ay tinukoy bilang ghost o graft-ridden projects, dahil sa kakulangan ng kinakailangang supporting documents, hindi pagkakaroon ng anumang civil works, o pagkakaiba sa tinukoy na lokasyon.
Umabot sa P389.6 milyon ang inilaang pondo sa naturang mga proyekto.
Ayon sa Ombudsman, ang suspension order ay iniisyu upang maiwasan ang pakikialam ng mga sangkot na tauhan sa nagpapatuloy na imbestigasyon.
Ginagawa rin ito upang maprotektahan ang public records at masiguro ang accountability measures na magpatuloy nang walang anumang gumagambala. RNT/JGC
