MANILA, Philippines – Sinabi ng Philippine Coast Guard (PCG) na ang patuloy na search and rescue operations para sa nawawalang mga indibidwal sa lumubog na MV Trisha Kerstin 3 ay nagresulta ng pagkarekober ng dalawa pang bangkay sa karagatan malapit sa Baluk-Baluk Island, Basilan noong Miyerkules.
Sa isang ulat, sinabi ng PCG na ang mga bangkay ay narekober sa tulong ng mga ahensya ng gobyerno, lokal na pamahalaan, at mga boluntaryong mangingisda.
Sa ngayon umakyat na sa 45 ang kabuuang bilang ng mga nasawi habang nanatili sa 316 ang bilang ng mga nakaligtas.
Inaalam pa ang pagkakilala ng mga bangkay at inihahanda para sa tamang disposisyon.
Samantala, inuuna ng Philippine National Police (PNP) ang pagkilala sa mga biktima sa pamamagitan ng DNA analysis.
Sa isang pahayag noong Miyerkules, sinabi ng PNP na nagsimula nang magbigay ng DNA samples ang mga pamilya ng biktima sa mga personnel ng scene of the crime operations upang makatulong sa pagkakakilanlan.
Layunin nito na masigurong nasusunod nang tama ang lahat ng proseso upang mapabilis ang pagkilala at maibalik nang maayos ang mga labi sa kanilang mga pamilya.
Ayon sa PNP, isa sa pinakamalaking hamon sa proseso ay ang kondisyon ng mga narekober na bangkay at ang pangangailangan para sa eksaktong forensic procedures.
Noong Martes ng gabi, natagpuan ng PCG technical divers ang lokasyon ng lumubog na ferry malapit sa Baluk-Baluk Island. Ang barko ay natagpuang nakahiga sa east-to-west na oryentasyon kaugnay ng isla. Jocelyn Tabangcura-Domenden
