MANILA, Philippines- Nadakip ng joint police at military operatives ang dalawang high-ranking officials ng Communist Party of the Philippines-New People’s Army (CPP-NPA) sa isang checkpoint sa Bulalacao, Oriental Mindoro.
Sinabi ni Maj. Gen. Roberto Capulong, commander ng 2nd Infantry Division, bahagi ang pagsasagawa ng checkpoint sa follow-up operation sa sagupaang naganap sa bayan ng Mansalay.
Kinilala niya ang mga naaresto na isang nagngangalang Ems, deputy secretary ng Southern Tagalog Regional Party Committee (STRPC) at Kagawaran ng Rehiyon sa Edukasyon (KARED), at alyas Patrick, regional staff ng KARED sa Edukasyon at dating platoon leader ng mga rebelde sa Mimaropa (Mindoro Oriental and Occidental, Marinduque, Romblon and Palawan).
Ani Capulong, naaresto ang dalawa noong Hulyo 13 sa isang checkpoint sa Sitio Banti sa Barangay San Roque.
Nasabat mula sa kanila ang caliber .38 pistol, isang M203 grenade launcher, hand grenade, at improvised explosive device components.
Inihayag ni Capulong na itinurn-over ang nadakip na CPP-NPA leaders sa Bulalacao Municipal Police Station. RNT/SA
