MANILA, Philippines- Inaresto ng mga tauhan ng Bureau of Immigration (BI) ang dalawang lalaking wanted sa South Korea dahil sa kinakaharap nilang serious crimes sa isinagawang operasyon sa Pampanga.
Iniulat ni BI fugitive search unit (FSU) Chief Rendel Ryan Sy ang pag-aresto kina Choi Suang Hwan at Kang Seunghoon sa magkahiwalay na operasyon noong Abril 24 sa pakikipag-ugnayan sa Criminal Investigation and Detection Group (CIDG).
Ayon sa BI, inaresto si Choi, 53, sa Brgy. Anunas, Clark Freeport Zone, Angeles City alinsunod sa isang mission order na inisyu ni BI Commissioner Norman Tansingco.
Nabatid na may kinahaharap na warrant of arrest si Choi na inisyu ng Seoul Eastern District Court sa Korea dahil sa pandarambong na iniulat na nagkakahalaga ng KW 75.5 milyon na paglabag sa Article 347- (1) ng Criminal Act of the Republic of Korea. Ang kanyang pasaporte ay binawi na ng gobyerno ng Korea, kaya siya ay isang undocumented alien.
Samantala, inaresto si Kang sa kahabaan ng Jose Abad Santos Ave. Clark Freeport Zone, Angeles City matapos ideklara itong pugante dahil sa warrant na inilabas laban sa kanya ng Incheon District Court sa Korea.
Pinaghahanap si Kang dahil sa ginawa nitong pandaraya na nagkakahalaga ng 850 Million KRW.
“These arrests underscore our relentless dedication to ensuring the safety and security of our communities. By working hand in hand with our law enforcement partners, we send a clear message that criminals will not find refuge in our country,” wika ni Tansingco.
Kapwa mananatili sina Choi at Kang sa holding facility ng BI sa Taguig habang hinihintay ang pagresolba ng kasong deportasyon laban sa kanila. Kris Jose
