MANILA, Philippines — Isinasailalim sa preliminary investigation ng Department of Justice ang 20 indibidwal, kabilang ang mga opisyal ng Department of Public Works and Highways at mga pribadong kontratista, kaugnay ng umano’y anomalya sa dalawang flood control project sa Barangay Sinsin, Balamban, Cebu.
Sinabi ni DOJ spokesperson at Prosecution Attorney Polo Martinez na natanggap ng National Prosecution Service noong Hulyo 29 ang unang reklamong kriminal na inihain ng National Bureau of Investigation Cebu District Office. Sinundan ito ng ikalawang reklamo laban sa parehong mga respondent para sa hiwalay na proyekto sa parehong distrito.
Kabilang sa mga respondent ang mga inhinyero at kawani ng DPWH, gayundin ang mga kontratistang sangkot sa bidding at pagpapatupad ng mga proyekto.
Nahaharap sila sa mga reklamong technical malversation, malversation of public funds, graft and corrupt practices, perjury, falsification of documents by public officers, falsification at paggamit ng falsified documents ng mga pribadong indibidwal, at paglabag sa Government Procurement Reform Act.
“These are complaints for purposes of preliminary investigation at this stage… No conclusive finding has been made yet,” Martinez clarified, noting that all respondents will be issued subpoenas and afforded the opportunity to submit counter-affidavits to refute the allegations,” Martinez said.
Bahagi ang mga reklamo ng pinaigting na kampanya ng pamahalaan laban sa umano’y mga flood control scam. Umabot na sa P800 milyon ang mga isinukong kickback at ari-ariang nabawi ng gobyerno at naipasa na sa Bureau of the Treasury.
Ang mga naunang kasong may kinalaman sa matataas na opisyal ay na-refer na sa Office of the Ombudsman at Sandiganbayan, habang ang mga kaso laban sa mga opisyal na mas mababa sa Salary Grade 27 ay nasa Regional Trial Courts sa Quezon City.
Ayon kay Martinez, inaasahang madaragdagan pa ang mga kaso habang patuloy na sinusuri ng mga law enforcement agency ang mga rekord ng flood control projects sa iba’t ibang engineering district.
“Should further complaints be filed, whether by the NBI or any law enforcement agency, this office will evaluate them under applicable rules and procedures,” aniya. Jocelyn Tabangcura-Domenden
