MANILA, Philippines – Umabot sa 26 barko ng Chinese Navy at China Coast Guard (CCG) ang namataan sa apat na mahalagang bahagi ng West Philippine Sea (WPS) mula Hulyo 21 hanggang 26, ayon sa Armed Forces of the Philippines (AFP).
Sinabi ni AFP spokesperson for the WPS Rear Admiral Roy Vincent Trinidad na nakita ang mga barko sa Ayungin Shoal, Bajo de Masinloc, Escoda Shoal, at Pag-asa Islands.
Sa bilang ng AFP, may 9 na barko sa Ayungin Shoal (7 CCG at 2 Chinese Navy), 13 CCG sa Bajo de Masinloc, 1 CCG sa Escoda Shoal, at 3 barko malapit sa Pag-asa Islands (1 CCG at 2 Chinese Navy).
Mas mataas ito kumpara sa 24 barko na naitala noong Hulyo 7 hanggang 13.
Ayon kay Trinidad, mahalaga ang patuloy na pagmamanman upang agad matukoy at masuri ang mga sasakyang-dagat sa loob ng katubigan ng Pilipinas.
“Through sustained vigilance and operational presence, the PN continues to reinforce national sovereignty, sovereign rights, and contribute to the safety, security, and stability of the maritime environment.” RNT/MDS
