MANILA, Philippines- May kabuuang 29,390 sa 42,002 barangay sa bansa ang nalinis na mula sa ilegal na droga, base sa Philippine Drug Enforcement Agency (PDEA) nitong Biyernes.
Sa press conference, ibinahagi ni PDEA Director General Isagani Nerez ang accomplishments ng ahensya kabilang ang bilang ng mga barangay na idineklarang drug-cleared.
May kabuuang 320 lugar naman ang tinukoy na “unaffected” o mga barangay kung saan walang naitalang indibidwal na gumagamit ng droga, mga tulak, drug den maintainers, at iba pang ilegal na drug activities.
Iniulat din ng PDEA na 6,179 barangay ang idineklarang “drug-free,” nangangahulugang kinumpirma ito ng Regional Oversight Committee on Barangay Drug Clearing (ROCBDC).
Subalit, may kabuuang 6,113 barangay ang itinuturing pa ring “drug-affected.”
Mula January 1 hanggng March 31, nagsagawa ang PDEA at iba pang ahensya ng kabuuang 10,161 operasyon na nagresulta sa pagkakaaresto sa 13,497 indibidwal at pagkakasabat sa P6.90 bilyong halaga ng ilegal na droga. RNT/SA
