MANILA, Philippines- Nasa 30 pamilya ang nawalan ng tahanan matapos masunog ang isang residential area sa Mandaue City, Cebu nitong Sabado ng gabi.
Ayon sa ulat, sumiklab ang insidente dakong alas-8 ng gabi sa Barangay Tingub.
Itinaas ng Bureau of Fire Protection – Mandaue ang second alarm at inabot ng halos isang oras bago maapula ng mga bumbero ang apoy na mabilis kumalat dahil dikit-dikit ang mga bahay.
Bagama’t walang naiulat na nasaktan, sinabi ng BFP na mahigit P600,000 halaga ng ari-arian ang nawasak.
Inaalam pa ng arson investigators ang mitsa ng pagliyab na nagsimula sa isa sa mga tahanan. RNT/SA
