35 ex-NPA sumuko sa Eastern Mindanao Command; 20 armas isinurender

DAVAO CITY – Inihayag ng Eastern Mindanao Command (EMC) ang pagsuko ng 35 dating miyembro ng New People’s Army (NPA) na may isinurender na 20 baril mula sa iba’t ibang unit ng NPA sa buong Davao del Norte, Davao de Oro, at Agusan Sur.

Iniharap nina Brigadier General Felix Ronnie Babac, commander ng 1001st Infantry Brigade, at Major General Allan Hambala, commander ng 10ID, ang isa pang grupo ng sumukong 20 rebelde kay Lieutenant General Luis Rex D. Bergante, commander ng EMC.

Sa tulong ng 60th Infantry Battalion, naging posible ang pagsuko sa pamamagitan ng matatag na pagsisikap nina Loreto Mayor Lorife M. Otaza, Kapalong Mayor Maria Theresa R. Timbol, at Laak Mayor Antonio L. Libuangan.

Kabilang sa 35 rebeldeng sumuko ay isang dating kalihim ng Regional Peasant Bureau at kalihim ng Dismantled Guerilla Front (DGF) 25 na si SMRC Execom member Marion Bagayas Fronteras, alyas Ak-Ak; at si Christianne Petiluna alyas Pen, KOMMID Propaganda staff na may parehong warrant of arrest. Nahuli sila, ngunit kalaunan ay nagpasya silang makipagtulungan sa kanilang yunit ng pag-aresto.

Naaresto rin ang isang dating NPA na siya ring tserman ng CTG front/aboveground legal organization Nagkahiusang Mag-uuma sa Laak (NAMULAK) na si Ruel Catambacan alyas Carbo.

Umamin umano siya na kanyang pinamumunuan ang CTG underground peasant movement na Pambansang Katipunan ng Magbubukid (PKM) na kinabibilangan ng mga bagong NPA recruits na sumusuporta sa kilusan at sa logistical needs ng armadong grupo sa kani-kanilang lugar.

Bunsod ng kanilang pagsuko, nagresulta ito sa pagbawi ng 16 na high-powered at 4 na low-powered firearms. Bago pa man nito, mayroon nang 15 dating NPA ang nauna nang sumuko dalawang buwan na ang nakakaraan sa 60IB.

Binigyang-diin ni BGen. Babac ang patuloy na pagtutok ng militar sa mga operasyon upang lansagin ang mga natitirang rebelde.

Iginiit naman ni MGen. Hambala ang kahalagahan ng pagsubaybay sa mabisang pagpapatupad ng NTF-ELCAC (National Task Force to End Local Communist Armed Conflict) BDP projects.

Upang matiyak na matutugunan ang mga hinaing na nagbunsod sa sigalot, ibinulgar niya na ang mga tropa ng Agila ay patuloy na nagpapakalat ng Mobile Community Support and Sustainment Program (MCSSP) sa mga lugar na dati nang idineklarang clear sa insurgency.

Pinabulaanan naman ni Lt. Gen. Bergante ang pinakakalat ng CPP-NPA-NDF na ang militar ay naghahangad ng marahas na komprontasyon, tulad ng naganap sa Northeast Mindanao area nitong mga nakaraang linggo.

Matatandaan na wala pang dalawang buwan, labindalawang (12) miyembro ng NPA ang napatay sa siyam na engkuwentro.

“There is no glory in the death of NPA rebels. I understand that every NPA rebel may have had legitimate individual reasons for joining the NPA. However, when we kill one NPA fighter, ten or twenty more rebels are bred, ready to fight the government. Entire families join the rebels, perpetuating a cycle of anger and violence. That’s why we encourage, we prefer, that the remaining CPP-NPA-NDFP members in Eastern Mindanao surrender,” giit ni Lt. Gen. Bergante.

Binigyang-diin pa niya na dahil sa amnesty program ng gobyerno ngayon, nagkakaroon sila ng pagkakataon na mamuhay nang mapayapa, muling buuin ang kanilang buhay, at makatanggap ng livelihood support. RNT