MANILA, Philippines – Apat na katao ang nasugatan habang nasa 60 pamilya ang naapektuhan matapos sumiklab ang sunog na tumupok sa humigit-kumulang 30 bahay sa Parañaque City noong Linggo ng umaga, Nobyembre 15.
Ayon sa Bureau of Fire Protection (BFP)-Parañaque, nagsimula ang sunog sa isang dalawang-palapag na bahay sa Linotype Street, Fourth Estate Subdivision, Barangay San Antonio, na nakaapekto sa tinatayang 150 residente.
Unang naiulat ang sunog dakong alas-5:44 ng umaga at agad na itinaas sa unang alarma.
Pagsapit ng alas-6:17 ng umaga, umabot ito sa ikatlong alarma matapos mabilis na kumalat ang apoy sa mga katabing kabahayan.
Idineklarang kontrolado ang sunog dakong alas-7:33 ng umaga bago tuluyang naapula pagsapit ng alas-8:01 ng umaga.
Nagtamo ng mga paso ang apat na biktima at agad na binigyan ng medikal na atensyon sa tulong ng mga emergency responder at Philippine Red Cross.
Umabot sa 38 fire truck at apat na ambulansiya ang rumesponde sa insidente, kabilang ang mga fire team mula sa Muntinlupa, Las Piñas at Makati.
Tumulong din sa operasyon ang mga tauhan ng lokal na disaster response office, barangay officials at mga boluntaryo.
Tinatayang P150,000 ang halaga ng mga ari-ariang napinsala sa sunog, batay sa paunang pagtataya ng BFP.
Patuloy ang imbestigasyon ng mga awtoridad upang matukoy ang sanhi ng sunog.