BULACAN, Philippines – Inaresto ng mga awtoridad ang apat na suspek sa San Ildefonso, Bulacan dahil sa umano’y pagbebenta ng mga pekeng plaka, ayon sa Land Transportation Office (LTO) nitong Martes, Hulyo 15.
Sa isang pahayag, sinabi ng LTO na isinagawa ang operasyon noong Sabado matapos kumpirmahin ang impormasyon tungkol sa ilegal na aktibidad.
“We immediately coordinated with the CIDG to conduct an operation against these people, and this resulted in their arrest and the confiscation of the fake plates,” ani LTO chief Assistant Secretary Greg Pua.
“We laud the LTO-Investigation and Intelligence Division headed by Renante Melitante and our partners in the Criminal Investigation and Detection Group for this successful operation,” dagdag pa niya.
Nakuha sa mga suspek ang marked money, 51 piraso ng pekeng plaka, printing machine, computer units, machine press, apat na cutting machine, vinyl reflectorized film, hole machine, 14 na piraso ng tray ng acrylic letters, tatlong acrylic border, at isang cold laminate machine.
Ang mga nakumpiskang bagay na ito ay nagkakahalaga ng P400,000.
“We assure the public na hindi titigil ang inyong LTO para matigil ang mga ganitong klaseng iligal na gawain,” saad ni Pua.
Nasa kustodiya na ngayon ng CIDG ang mga suspek na nahaharap sa mga kasong paglabag sa Presidential Decree 1730 gayundin sa imitasyon at maling representasyon na may kinalaman sa mga plaka sa ilalim ng Land Transportation and Traffic Code. RNT/MND
