LAGUNA, Philippines – Ligtas nang nakapiling ng kanyang pamilya ang isang limang taong gulang na batang lalaki na iniulat na dinukot sa Calamba City matapos matagpuan sa Tanay, Rizal noong Huwebes, Oktubre 22.
Ayon sa Calamba City police, natagpuan ng isang concerned citizen ang bata na umiiyak sa labas ng San Ildefonso Church sa Barangay Aldea at agad itong iniulat sa lokal na pulisya.
Dinala ng mga tauhan ng Women and Children Protection Desk (WCPD) ang bata sa himpilan ng pulisya, kung saan binigyan siya ng pagkain at angkop na pangangalaga.
Bago maghatinggabi noong Huwebes, dumating sa Tanay police station ang isang imbestigador mula sa Calamba kasama ang mga magulang ng bata, na naging daan upang muli silang magkita.
Iniulat ng ina na nawawala ang kanyang anak bandang alas-10:15 ng umaga noong Oktubre 22. Gayunman, ipinakita umano sa CCTV footage mula sa Looc Elementary School sa Barangay Looc na may lalaking kumuha sa bata bandang alas-9:35 ng umaga noong Oktubre 20.
Ayon sa pulisya, nalaman ng imbestigador mula sa hepe ng Barangay Public Safety Office (BPSO) na dating empleyado ng tanggapan ang hinihinalang dumukot sa bata.
Humingi ng tulong ang pulisya sa BPSO upang makontak ang suspek at mahikayat itong ibalik ang bata. Kalaunan, natagpuan ang bata sa nasabing simbahan sa Tanay.
Ayon sa isang ulat, sinabi ng ina na kilala ng bata ang hinihinalang dumukot sa kanya bilang dating kinakasama ng kanyang lola.
Patuloy ang imbestigasyon upang mahanap ang suspek at maisampa ang kaukulang kaso. RNT/MDS
