MANILA, Philippines – Nasagip ng mga operatiba ng Pasig City police ang anim na bata mula sa dalawang lalaki na nagtangkang dukutin umano sila sa Barangay Rosario, Pasig City.
Sinabi ng mga awtoridad na ang mga suspek na kinilalang sina Melvin Labuan, 47, at Ricardo Obenieta Jr., 45, ay nahuli noong Biyernes, Hunyo 21.
Anila, dalawa sa mga biktima ay 14 taong gulang, habang apat na iba pa ay 11, siyam, lima, at tatlong taong gulang na pawang mga residente ng Barangay Rosario sa Pasig.
Nabatid sa imbestigasyon ng pulisya na inimbitahan ni Labuan ang isa sa 14-anyos na biktima na uminom ng milk tea sa ibang lugar, na tinanggap naman ng biktima. Kasama niya ang kanyang dalawang kapatid, isang kaibigan, at ang lima at tatlong taong gulang na mga anak na kanyang inaalagaan noon.
Sakay ang mga biktima sa taxi na minamaneho ni Obenieta.
Habang naglalakbay sa Westbank Road sa Barangay Rosario, ang taxi ay pinara ng mga pulis sa isang checkpoint, matapos makita ng mga ito ang isa sa mga biktima na nakadikit ang kanyang kamay at lumabas sa bintana ng sasakyan.
Agad namang tinanong ng mga pulis ang mga suspek kung bakit ginagawa iyon ng bata, at sinabi ng mga suspek na nakaramdam na lamang ng pagkahilo ang bata at nagsusuka.
Gayunpaman, naghinala ang mga pulis matapos makita ang bilang ng mga menor de edad sa loob ng sasakyan, dahilan para mas lalong tanungin ang mga suspek.
Ibinunyag ng mga biktima na hindi nila kilala ang taxi driver, at sinabing kilala lang nila si Labuan dahil residente rin ito ng Barangay Rosario.
Dagdag pa nila, hindi alam ng kanilang mga magulang ang kanilang kinaroroonan.
Dahil sa mga pahayag ng mga bata, agad na tinawagan ng pulisya ang isa sa mga magulang ng mga biktima, na kinumpirma na wala silang alam tungkol sa imbitasyon ni Labuan sa mga bata.
Matapos makumpirma ang impormasyon, dinala ng pulisya ang mga suspek sa Barangay Rosario para sa dokumentasyon at kalaunan sa himpilan ng pulisya para sa karagdagang imbestigasyon at kaukulang aksyon.
Nasa kustodiya na ngayon ng pulisya ang mga suspek at nahaharap sa kasong paglabag sa Republic Act 7610, o ang Special Protection of Children Against Child Abuse, Exploitation, and Discrimination Act. RNT
