TACLOBAN CITY – Patay ang anim na rebeldeng New People’s Army sa engkwentro sa 19th Infantry “Commando” Battalion sa Barangay Paco, Las Navas, Northern Samar noong Lunes, Disyembre 2.
Ang mga nasawi ay miyembro ng Subregional Committee Emporium, Eastern Visayas Regional Party Committee sa ilalim nina Ariel Baselga alyas Poly at Aries.
Isang sibilyan ang nag-tip sa mga tropa na may isang grupo ng mga armadong lalaki ang dumaraan sa barangay.
Ipinakalat ang mga sundalo at nadiskubre ang isang pinagtaguan ng NPA, na napapaligiran ng mga ipinagbabawal na anti-personnel mine.
Tumawag ang mga tropa sa suporta ng artilerya at nakipagbakbakan sa mga rebeldeng komunista sa loob ng halos 30 minuto.
Limang lalaking gerilya at isang amazona ang napatay sa pamamaril.
Narekober sa lugar ang dalawang M16 rifle, dalawang pistola, tatlong granada, at mga personal na gamit.
Samantala, dalawang rebeldeng NPA ang sumuko mula sa Subregional Committee Sesame sa 78th Infantry Battalion sa ilalim ng 8th Infantry Division sa Barangay San Gabriel, Borongan City, Eastern Samar noong Linggo, Disyembre 1.
Ibinalik ng mga sumuko ang mga high-powered firearms – isang M60 light machine gun, isang K3 Squad Automatic Weapon (SAW), dalawang AK47 rifles, apat na M16, isang M14, at isang M4 rifle. RNT
