MANILA, Philippines – Inaprubahan ng House of Representatives nitong Martes, Hulyo 30, sa ikatlo at huling pagbasa ang isang panukalang batas na magbibigay ng access sa medikal na marijuana.
Pinahihintulutan ng House Bill 10439 ang paggamit ng medikal na marijuana o medikal na cannabis para sa mga kwalipikadong pasyente.
May kabuuang 177 mambabatas ang bumoto pabor sa panukalang batas, kung saan siyam na mambabatas ang bumuto ng No, at siyam din ang nag-abstain.
Tinutukoy ng panukalang batas ang isang kwalipikadong pasyente bilang isang taong na-diagnose ng isang akreditadong doktor na may kondisyong medikal o may mga sintomas na nauugnay sa isang kondisyong medikal na, sa pagsusuri ng kinikilalang manggagamot, ay tatanggap ng medikal na cannabis bilang paggamot.
Gayundin, ang panukalang batas ay nagtatatag ng Medical Cannabis Office (MCO), na magkokontrol sa paggamit ng medikal na cannabis at magtitiyak ng accessibility nito.
Ang panukalang batas, gayunpaman, ay nagbabawal sa mga sumusunod na gawain:
-pag-aangkat, paglilinang, paggawa, pag-iimbak at pamamahagi ng medikal na cannabis, mga produkto nito, o derivative nang walang pahintulot mula sa MCO;
-pagbebenta o pangangalakal ng medikal na cannabis sa mga pasyente, doktor, botika, ospital, klinika, dispensaryo at iba pang pasilidad na medikal nang walang awtoridad, lisensya o akreditasyon mula sa MCO;
-pagtatanim at pagpapatubo para sa pananaliksik at pagpapaunlad nang walang awtoridad mula sa MCO;
-reseta at pangangasiwa ng medikal na cannabis ng hindi kinikilalang manggagamot;
-reseta at pangangasiwa ng medikal na cannabis nang higit sa isang taon ng akreditadong manggagamot;
-paggamit ng medikal na cannabis nang walang reseta o paggamit nang lampas sa iniresetang dosis; at
-iba pang katulad na mga kilos na ginawa nang walang awtoridad ng MCO.
Isang counterpart bill sa Senado ang itinaguyod sa plenaryo noong Marso. RNT
