Inihain ng kanyang abogadong si Atty. Mark Tolentino, ang Certificate of Candidacy ni Pastor Apollo Quiboloy sa ilalim ng Workers Peasant Party. Cesar Morales
MANILA, Philippines- Kumpirmadong tatakbo sa Senado si Pastor Apollo Quiboloy, ang leader ng Kingdom of Jesus Christ (KOJC) na inaresto ng mga awtoridad noon lamang nakaraang buwan sa KOJC compound sa Davao City.
Ayon kay Comelec spokesperson Atty. John Rex Laudiangco, tinanggap ang Certificate of Candidacy (COC) ni Quiboloy ng ala-1:47 ng hapon nitong Martes, Okt. 8 dahil mayroon itong duly authorized representative na nagsumite ng kanyang kandidatura.
Sa pamamagitan ng kanyang kinatawan, inihain ni Atty. Mark Christopher Tolentino ang COC ni Quiboloy.
Si Quiboloy ay inaresto dahil sa arrest warrants dahil umano sa paglabag sa Special Protection of Children Against Abuse, Exploitation, at Discrimination Act maging sa qualified human trafficking.
Kinasuhan din siya ng federal grand jury sa US District Court for the Central District of California para sa conspiracy to engage in sex trafficking by force, fraud and coercion and sex trafficking of children; sex trafficking by force, fraud and coercion; conspiracy; at bulk cash smuggling.
Kasalukuyang nakaditene si Quiboloy sa PNP Custodial Center sa Camp Crame, Quezon City. Jocelyn Tabangcura-Domenden
