MANILA, Philippines- Umapela sa Estados Unidos si Cagayan de Oro City Rep. Rufus Rodriguez upang i-donate na lamang sa Pilipinas ang warship na nakatakdang i-deactivate sa 2025.
Ginawa ng mambabatas ang apela sa pamamagitan ng ipinadalang liham kina State Secretary Anthony Blinken, Defense Secretary Lloyd James Austin III at US Ambassador to Manila MaryKay Carlson.
Binigyang-diin ni Rodriguez na kung ido-donate ng US government ang USS Philippine Sea sa Pilipinas ay magagamit itong suporta sa Navy at Coast Guard patrols sa palibot ng bansa kabilang na ang West Philippine Sea.
“I am sure that it will be a big asset in our efforts to defend our territorial waters, our sovereign rights, and our personnel and fishermen from intruders,” ayon kay Rodriguez.
Ang US warship ay isang Flight II Ticonderoga-class guided missile cruiser na ngayon ay aktibo pang ngagamit ng US Navy.
Sinabi ni Rodriguez sa tatlong opisyal na ang USS Philippine Sea ay “named for the Battle of the Philippine Sea during World War II.”
Ang naturang barko ay nakatapos na ng ilang deployments bilang Operation Enduring Freedom, ang official name na ginamit ng US government para sa global war laban sa terorismo mula 2001 hanggang 2014.
Ipinadeploy ang USS Philipine Sea sa Eastern Mediterranean bilang tugon sa giyera ng Israel laban sa Hamas at encounters ng US sa Houthis.
Ang USS Philippine Sea ang sumagip sa 26 Filipino crew members ng supertanker Brillante Virtuoso, matapos sunugin umano ng mga pirata gamit ang rocket-propelled grenades sa Aden, Yemen.
“With its historical background and its name being apropos and relevant to the current issue on our West Philippine Sea sovereign rights being illegally challenged by China, may I request that the USS Philippine Sea be donated to the Philippines,” nakasaad sa liham ni Rodriguez kina Blinken, Austin at Carlson. Meliza Maluntag
