MANILA, Philippines- Inimbitahan ni Pangulong Ferdinand R. Marcos Jr. si Thai Prime Minister Paetongtarn Shinawatra na bumisita sa Pilipinas.
Si Department of Foreign Affairs (DFA) Secretary Enrique Manalo ang naghatid ng imbitasyon sa isinagawang bilateral meeting kasama si Thai Foreign Minister Maris Sangiampongsa, araw ng Biyernes.
“I had a fruitful meeting with Foreign Minister Maris and I look forward to more opportunities to exchange views with him on how we can strengthen and elevate our bilateral relationship, as well as our cooperation in addressing various regional and international challenges,” ang sinabi ni Manalo matapos ang 6th Philippine-Thailand Joint Commission for Bilateral Cooperation (JCBC) meeting sa Bangkok.
“[I] reiterate President Marcos’ invitation to the Thai Prime Minister Paetongtarn Shinawatra to visit the Philippines,” dagdag niya.
Nauna rito, nagkita at nagpulong sina Pangulong Marcos at Thai prime minister sa Association of Southeast Asian Nations (ASEAN) Summit and Related Meetings sa Laos noong nakaraang linggo.
Sa ulat, si Paetongtarn, umupo sa pwesto noong Agosto 16, ang pinakabatang Thai prime minister at pinuno ng gobyerno sa Asya sa edad na 37.
Nauna nang binalangkas ni Paetongtarn na isasama niya ang “security cooperation within the ASEAN region and among foreign countries,” para isulong ang kapayapaan, katatagan at progreso ng Thailand at rehiyon ukol sa “sustainable basis.”
Ang kanyang foreign policy ay may marka ng “firm posture of not becoming party to international conflicts, transforming geopolitical challenges between major powers into strategies that enhance opportunities for Thailand.”
Winika pa ni Paetongtarn na ang kanyang gobyerno ay makikipagtulungan sa mga kalapit na estado para magtatag ng mekanismo na tutugon sa transnational crimes, kabilang ang online fraud at phone scams.
Sa JCBC, pinag-usapan naman nina Manalo at Maris ang mga pamamaraan para palakasin ang Manila-Bangkok cooperation isa larangan ito at ang mga kaganapan sa South China Sea, Myanmar at Gitnang Silangan. Kris Jose
