MANILA, Philippines- Inirekomenda ng Philippine National Police (PNP) nitong Martes ang pagsibak sa 11 opisyal na umano’y pinagtakpan ang ilegal na aktibidad ng dalawang “moonlighting” Special Action Force (SAF) personnel.
Base sa Internal Affairs Service (IAS), nakita sa ebidensya ang pagsasabawatan ng 11 pulis upang palabasin na nagsasagawa sina SAF commandos Corporal George Rojo Mabuti at Patrolman Roger Ramos Valdez ng official duties sa 52nd at 55th Special Action Companies Zamboanga.
Subalit, nagsisilbi umano sina Mabuti at Valdez bilang security escorts para sa isang Chinese national na iniuugnay sa isang Philippine offshore gaming operator at naaresto sa isang village sa Ayala Alabang, Muntinlupa City kasunod ng isang kaguluhan noong Mayo.
Inihayag ng PNP IAS nitong Martes na lumabas na guilty ang 11 pulis sa grave misconduct, grave dishonesty, at conduct unbecoming of a police officer.
Sa 11 inirekomendang sibakin, anim ang police commissioned officers, kabilang ang isang lieutenant colonel; at lima naman ang police non-commissioned officers.
Samantala, ang dalawang SAF personnel ay guilty sa “moonlighting, grave irregularities in performing their duties, and engaging in protective services to private persons without approval from the Police Security and Protection Group,” ayon sa PNP IAS.
“This resolution serves as a stern reminder that no police officer is above the law. The public has the right to expect the highest level of integrity from those sworn to serve and protect the public,” ani IAS Inspector General Brigido Dulay.
“Any deviation from this duty will be met with the appropriate disciplinary sanctions,” dagdag niya.
Noong Hulyo, nagbabala si PNP Chief Gen. Rommel Marbil na ang mahuhuling pulis na suma-sideline ay tatanggalin sa serbisyo. RNT/SA
