Reklamasyon pinalagan ng grupo ng mga mangingisda; kilos-protesta ikinasa

MANILA, Philippines – Isang araw bago ang pagdiriwang ng National Fisherfolk’s Day sa bansa, nagsagawa ng kilos protesta ang iba’t ibang grupo ng mga mangingisda sa Maynila.

Panawagan ng mga fisherfolk sa pamahalaan na itigil na ang isinasagawang reclamation project na nakakasira sa kanilang kabuhayan.

Nanawagan din ang mga mangingisda na bawiin ng Korte Suprema ang kanilang resolusyon na nagpapahintulot sa mga komersyal at malalaking mangingisda na mangisda sa loob ng 15 kilometrong municipal na katubigan.

Nagmartsa mula sa España Boulevard ang higit 500 mangingisda mula Cavite, Laguna, Parañaque, Maynila, Navotas, Malabon, Bulacan, Bataan, at Zambales, at plano ring magtungo sa Mendiola.

Mahigpit na seguridad ang ipinapatupad ng MPD at pansamantalang isinara sa motorista ang mga kalsada patungong Mendiola dahil sa nasabing aktibidad.

Ang magkabilang grupo ay naharang na rin sa bahagi ng Recto at Legarda at hindi na pinayagang makalapit sa Mendiola.
(Jocelyn Tabangcura-Domenden)