MANILA, Philippines – Sinabi ni Vice President Sara Duterte na ang mga pangalan na natuklasan na sinasabing recipients ng confidential funds ng kanyang tanggapan at noong panahon ng kanyang panunungkulan bilang Kalihim ng Department of Education (DepEd) ay talagang “aliases” na ginamit sa intelligence operations.
Sinabi ito ni VP Sara sa isang chance interview sa The Hague, Netherlands, kung saan ay tinanong siya kung paano niya sasagutin ang alegasyong ibinabato laban sa kanya sa kanyang impeachment trial, partikular ang sinasabing ‘fictitious names’ na nakalista bilang mga benepisyaryo ng confidential funds na budget ng kanyang gobyerno.
Sinabi ni VP Sara na plano niyang sagutin ito sa mismong trial. Bahala na aniya ang kanyang mga abogado na mangalap ng ebidensya at affidavits para kontrahin ang nasabing alegasyon.
Binigyang-diin pa ni VP Sara na ang mga pangalan na nabanggit ay “in fact, aliases.”
“Let me just say this, I think it is wrong for everyone to pick up as truth or as a fact all the pronouncements of the members of the House of Representatives, particularly with the fictitious names, because there are rules in intelligence operations,” ang sinabi ni VP Sara.
“And you already heard some of intelligence, people who work in intelligence, say that aliases are often used in intelligence operations,” aniya pa rin.
At nang hingan ng karagdagang detalye sa kanyang sinabi at kung ano ang nais niyang ipakahulugan dito, ang tugon ni VP Sara ay, “That can be discussed during the trial. I do not want to elaborate on intelligence operations.”
Sa katunayan, aniya, isinama ng kanyang legal team ang dalawang intelligence experts na magsisilbing kanilang resource persons sa panahon ng trial.
“So, let us wait for the trial and as I said yesterday, if there is no trial, then I will answer it publicly. I just want to wait what will happen to the articles of impeachment,” ang wika ni VP Sara.
Sa ulat, ang mga pangalang “Mary Grace Piattos, Chippy McDonald, Marian Rivera, and Chel Diokno,” ay lumabas sa listahan ng Department of Education bilang mga recipients sa ilalim ng liderato ni VP Sara, na nagresulta sa pagdududa ng publiko kaugnay sa kung saan ginamit ang budget ng DepEd at Office of the Vice President (OVP).
Matatandaang sinabi ng Philippine Statistics Authority (PSA) na may 1,322 mula sa 1,992 recipients ng Office of the Vice President’s confidential funds ang walang birth records; habang 405 mula sa 677 recipients sa confidential funds ng Department of Education (sa panahon pa rin ni VP Sara) ang wala ring birth certificates. Kris Jose
