P2.5M bloke ng marijuana nasamsam sa buy-bust ops sa Baguio, 2 arestado

Dalawampu’t isang kilo ng pinatuyong dahon ng marijuana na nagkakahalaga ng P2,520,000.00 at dalawang drug personalities ang arestado sa buy-bust operation ng Philippine Drug Enforcement Agency-CAR Baguio/Benguet at Mt. Province Provincial Office sa Burnham-Legarda, Baguio City nitong Hulyo 11, 2025.

Nahulihan ang mga suspek ng 20 piraso ng pinatuyong marijuana brick at isang pahabang anyo matapos makipagtransaksyon sa isang undercover agent.

Kinilala ni Regional Director Derrick Arnold C. Carreon ang mga suspek na isang 43-anyos na lalaki mula sa Bakun, Benguet, at isang 52-anyos na lalaki mula sa Cabanatuan, Nueva Ecija.

Kasalukuyan silang nasa kustodiya ng PDEA-Cordillera, at sinasampahan sila ng kasong paglabag sa Republic Act 9165 o Comprehensive Dangerous Drugs Act of 2002. DANNY QUERUBIN