MANILA, Philippines – Sinabi ni Senador Ronald “Bato” Dela Rosa nitong Huwebes na hindi siya dadalo sa ikaapat na State of the Nation Address (SONA) ni Pangulong Ferdinand “Bongbong” Marcos Jr. sa Hulyo 28.
Kinumpirma ito ni Dela Rosa, isang matatag na kaalyado ng pamilya Duterte, sa isang panayam sa telepono sa mga mamamahayag, na idiniin na ayaw niyang magpanggap na may mabuting pakikipag-ugnayan sa ilang opisyal mula sa Malacañang at House of Representatives sa kaganapan.
“Ayaw ko magkipag-plastikan. Alangan naman pupunta ‘ko doon na nakasimangot. Pangit, diba? Alangan naman pupunta ko doon na pa-smile-smile kahit na masama ang loob ‘ko sa kanila,” ani ng senador.
“So, ano pa? Makipag-plastikan ako doon sa mga congressman na masama ang loob ko. Hindi naman lahat ng congressman, pero may mga congressman doon na masama ang loob ko at mayroon ding mga tao sa Malacañang na masama ang loob ko. So, bakit ako makipag-plastikan?”
Nilinaw din ni Dela Rosa na ang paglaktaw sa SONA ni Marcos ngayong taon ay personal niyang desisyon, at maaaring magdesisyon ang ibang mga senador sa tinatawag na Duterte bloc sa kanilang sarili.
Kabilang sa mga senador ng “Duter7” sina Dela Rosa, Bong Go, Robin Padilla, Rodante Marcoleta, Mark Villar, Camille Villar, at Imee Marcos.
Nang tanungin ang kanyang inaasahan sa kung ano ang isasama sa presidential speech, pinalutang ni Dela Rosa ang posibilidad na banggitin ni Marcos ang diumano’y warrant of arrest na inilabas laban sa kanya ng International Criminal Court (ICC) dahil sa war on drugs.
“I will expect na i-insist ni Secretary Bersamin ‘yung sinabi niya,” saad niya.
Ang tinutukoy ng police officer-turned-senator ay ang naunang pahayag ni Bersamin na maaaring arestuhin si Dela Rosa kapag naglabas ng warrant of arrest ang ICC. Samantala, sinabi ng Malacañang na wala pa silang natatanggap na komunikasyon hinggil dito.
Sinabi rin ni Dela Rosa na wala na siyang inaasahan sa administrasyong Marcos.
“Wala na akong expectation sa gobyerno na ito. Hope na lang, hope. Ayaw ko nang umasa. Wala na lang ako, nag-hope na lang ako na mag-focus sila na pagandahin ang buhay ng Pilipinas. ‘Yun na lang ang aking hope,” ayon sa kanya.
Si Dela Rosa ay nagsilbi bilang hepe ng Philippine National Police (PNP) noong administrasyong Duterte at naging punong tagapagpatupad ng war on drugs. RNT/MND
