MANILA, Philippines – Dapat ay awtomatikong ituloy ng Senado ang pagdinig sa impeachment ni Vice President Sara Duterte kung babaliktarin ng Korte Suprema ang desisyon nito, ayon kay retired Senior Associate Justice Antonio Carpio.
Ani Carpio, ang impeachment trial ay dapat na magpatuloy kung papaboran ng Korte Suprema ang motion for reconsideration na inihain ng Kamara.
“Wala nang botohan ‘yan because balik tayo doon sa ‘Is this Constitutional?’ Sinabi ng Supreme Court ngayon, kung mag-reconsider sila, ‘Yes, Constitutional,’ so balik doon sa provision—The same shall constitute the Articles of Impeachment and trial by the Senate shall forthwith proceed,” sinabi ni Carpio.
Ito ay kasunod ng desisyon ng Korte Suprema na ang Articles of Impeachment laban kay Duterte ay unconstitutional at ipinagbabawal sa ilalim ng one-year rule.
Matatandaan na bumoto ang Senado para isantabi ang Articles of Impeachment laban kay Duterte sa 19 sumang-ayon, apat ang tumutol at isang abstention.
Dagdag pa, sinabi rin ni Carpio na kung magdesisyon ang Korte Suprema pabor sa Kamara, hindi na umano kailangan na maghain pa ng mosyon ang mga senador para buhayin ang Articles of Impeachment.
“Wala na. Of course, they will debate. Let’s say, the majority will say ‘No, we will not revive it,’ akyat ang prosecution sa Supreme Court. Sasabihin nila, ‘Dapat ba i-approve pa ito ng majority ng Senate bago mag-revive o sundin na lang natin ‘yung specific command of the Constitution—trial by the Senate shall forthwith proceed. I think klaro naman ‘yung Constitution,” aniya. RNT/JGC
