NANAWAGAN ang mga opisyal ng gobyerno sa Pilipinas para sa regional cooperation at multisectoral support para labanan ang illicit trade sa Southeast Asia, na anila’y tuloy-tuloy at lumalagong banta.
“Southeast Asia’s porous borders, uneven enforcement capacity, and fragmented regulatory frameworks make the region vulnerable to criminal operations,” ayon sa mga eksperto na dumalo sa isang high-level briefing noong August 5, 2025.
Isinagawa ng The Financial Times ang event na “Combatting Illicit Trade in Southeast Asia,” sa Shangri-La The Fort Manila, sa Taguig City.
Sinabi ni Department of Interior and Local Government Undersecretary for peace and order Nestor Sanares na ang illicit trade ay banta hindi lang sa ekonomiya kundi sa kaligtasan at kapakanan ng mga tao.
“It fuels corruption, finances criminal networks, and exploits the most vulnerable among us. Whether it involves smuggling, counterfeiting, trafficking, or illegal drugs, these are not isolated issues. They are transnational, deeply rooted and continuously evolving,” ani Sanares.
Sinabi ni Sanares na sa Pilipinas, ang mahigpit na koordinasyon sa pagitan ng Philippine National Police, National Intelligence Coordinating Agency, at mga lokal na barangay ay nagsisilbi ngayon bilang ‘early warning system.’
Tinukoy rin ni Sanares ang kolaborasyon, kasama ang brand owners at logistics companies sa pamamagitan ng joint Task Force Against Counterfeit Goods, na aniya’y nakayanan at nagawa ng PNP na protektahan ang consumers at lansagin ang counterfeit supply chains.
“Cross-border cooperation is also vital,” ani Sanares sabay sabing “Our partnerships with Malaysia, Indonesia, and Thailand have resulted in the interception of trafficking and contraband even before they reach Philippine shores.”
Sa kabilang dako, sinabi naman ni Bureau of Internal Revenue Commissioner Romeo Lumagui Jr. na ang pinagsama-samang pagsisikap ng multi-agency groups at ng publiko ang tuluyang makapagpapasya kung ang illicit trade at mga masasamang benepisaryo nito ay makapagpapatuloy pa na abusuhin ang publiko at pahinain ang ekonomiya.
Sinabi ni Lumagui na ang “extensive coastline, innovative smuggling schemes, at lumalagong digital marketplace” ng Pilipnas ay kabilang sa mga maraming hamon na kinahaharap ng gobyerno.
Ani Lumagui, sa nakalipas na dalawang taon, itinatag ng BIR ang multi-agency task forces, gaya ng Illicit Trade Task Force, pinagsama-sama ang mga kinatawan ng Bureau of Customs, PNP, National Bureau of Investigation, at iba pang mahahalagang partners para sa ‘coordinated, intelligence-driven operations.’
Nagbunga umano ito sa pagsamsam ng maraming iligal na kalakal, milyon-milyong pisong kita ng gobyerno, hindi paglaganap ng masamang kalakal sa merkado at paglaya ng nasa 155 obrero na pwersahang pinagtrabaho sa pabrika ng sigarilyo sa Bgry. Moranquillo, San Rafael, Bulacan.
Nakasampa na ang kasong P596 milyong tax deficiency sa Court of Tax Appeals at human trafficking laban sa dayuhang nagpapatakbo ng nasabing kompanya.
Kinilala rin ng Lumagui ang papel ng mga mamamayan sa kampanya laban sa illicit trade at pangangailangan ng teknolohiya bilang ‘real-time authentication tools, para tumulong na i-identify o tukuyin ang fake o smuggled products at mas pinahigpit na border controls kasama ang electronic verification at mahigpit na kolaborasyon sa ASEAN. KRIS JOSE
