MANILA, Philippines – Inaresto ang Amerikanong pastor na si Jeremy Ferguson, direktor ng New Life Baptist Church of Mexico, Pampanga, dahil sa paglabag sa RA 7610 matapos ang maraming reklamo mula sa mga batang nasa kanyang pangangalaga.
Ayon sa Department of Social and Welfare and Development, 156 bata — 78 lalaki at 78 babae, mula 3 buwang gulang hanggang 17 taong gulang — ang nasagip mula sa pasilidad matapos iulat ang pisikal, berbal, at sikolohikal na pang-aabuso, panganib sa sunog, maling paggamit ng pondo, at kawalan ng pagsunod sa mga pamantayan ng lisensya at akreditasyon.
Naglabas si Social Welfare Secretary Rex Gatchalian ng cease-and-desist order at sinabi na magsasampa ng kaso laban kay Ferguson, kasama ang hiling na Hold Departure Order upang matiyak na haharap siya sa paglilitis.
Nasa pangangalaga na ngayon ng DSWD sa Lubao, Pampanga ang mga bata. Santi Celario
