MANILA, Philippines – Iginiit ni Manila 6th District Rep. Bienvenido Abante Jr. na mahalaga ang international cooperation sa paglaban kontra sex trafficking, partikular ng kababaihan at mga bata, kaya’t suportado niya ang extradition ng US sa lider ng Kingdom of Jesus Christ at self-appointed son of God na si Apollo Quiboloy.
“Countries need to work together to stop it (human trafficking). International cooperation, including extradition, should be utilized for us to make inroads against this evil,” pahayag ni Abante nitong Sabado, Agosto 23.
Bilang chair ng House Committee on Human Rights, sinabi niyang nakagawa na ng hakbang ang Pilipinas para patibayin ang mga batas kontra trafficking, ngunit dahil transnational ang naturang krimen, kinakailangan pa rin ang koordinasyon sa ibang mga bansa.
Binigyang-diin niya ang United Nations Protocol to Prevent, Suppress and Punish Trafficking in Persons, Especially Women and Children o Palermo Protocol, na nilagdaan ng Pilipinas noong 2002 at nag-aatas ng kooperasyon sa imbestigasyon, pag-uusig, at proteksyon ng mga biktima.
“Our responsibility does not end at our borders. When the fight is against a crime that violates the most vulnerable amongst us, there should be no safe havens,” ani Abante.
Dagdag pa niya, ang pagsuporta sa extradition ni Quiboloy ay hakbang tungo sa pagpapatupad ng hustisya, pagtupad sa internasyonal na obligasyon ng bansa, at higit sa lahat, sa pangangalaga sa kababaihan at kabataan laban sa pagsasamantala. RNT/JGC
