MANILA, Philippines – Naghain ng petisyon ang grupong Kaya Natin! Youth sa Korte Suprema upang hamunin ang constitutionality ng Republic Act 12232, o batas na nagpapaliban sa paparating na December 2025 Barangay and Sangguniang Kabataan elections (BSKE).
Sa pahayag, sinabi ng legal counsel ng grupo na si Atty. Emil Marañon na naghain sila ng petition for certiorari, prohibition at mandamus na humahamon sa RA 12232, kahalintulad ng petisyon na inihain ng beteranong election lawyer na si Romulo Macalintal noong Agosto 15.
Pinalawig sa RA 12232 ang termino ng barangay at SK officials mula tatlong taon patungong apat na taon, dahilan para iurong din ang susunod na BSKE sa unang Lunes ng Nobyembre 2026.
Tinukoy ng grupo ang 2023 Macalintal v. Commission on Elections (Comelec) ruling na nagdedeklarang ang postponement ng 2022 BSKE ay unconstitutional.
Sinabi sa ruling na ang pagpapaliban ay dapat na suportado ng “sufficiently important, substantial, or compelling reasons to safeguard the right of suffrage.”
“While Congress, under the 1987 Constitution can indeed lengthen the term of office of barangay and SK officials, the retroactive application of the term-lengthening provisions of RA 12232… impermissibly [circumvents] the Macalintal v. Comelec 2023 ruling.”
Sinabi ng mga petitioner na dahil sa pagpapaliban, dalawa sa kanila ang mawawalan ng karapatan na makatakbo sa SK at ang isa naman ay mawawalan ng karapatan na makaboto sa posisyon sa SK.
“The postponement will violate the petitioners’ constitutional right of suffrage, and their basic human right to a periodic, genuine, and regular elections as duly recognized by international law,” paninindigan ng grupo.
Ani Marañon, hinihiling din ng petisyon sa SC na gamitin ang term-lengthening provisions sa mga nanalo lamang sa December 1, 2025 BSKE.
“Congress could have lengthened the subject terms of office without necessarily committing the unconstitutional act of postponing the elections,” ayon pa sa grupo. RNT/JGC
