Pagpapalawak ng free tertiary education isinusulong ni Senador Bong Go

MANILA, Philippines – Iginiit ni Senador Christopher “Bong” Go sa Senado na gawing prayoridad ang pagpapalawak sa access sa libreng tertiary education. Sa binuong batas sa panahon ng Duterte administration, si Go bilang Chair ng Senate Youth Committee, ay naghain ng panukala na mas magpapalawak pa sa sakop nito at maaabot ang mga estudyanteng nangangailangan.

Sa pagsasalita sa pagdinig ng Senate Committee on Higher, Technical, and Vocational Education nitong Miyerkules, Agosto 27, muling ipinahayag ni Go ang kanyang commitment sa pagsusulong ng mga hakbang upang mapalakas ang inclusivity sa edukasyon at basagin ang mga nagiging hadlang sa mga mahihirap at disadvantaged Filipino youth.

“Education is a right, not a privilege, kaya tuloy tuloy lang po ang ating trabaho. Bilang Chairman ng Committee on Youth, prayoridad ko ang edukasyon ng ating mga kabataan na pundasyon ng kanilang mga pangarap. Ito ang susi sa kanilang magandang kinabukasan,” paliwanag ni Go.

Binalikan ng senador ang landmark reform na pinasimulan sa administrasyong Duterte, kung saan dati siyang nagsilbing Special Assistant to the President.

Tinukoy niya ang pagpirma sa Republic Act No. 10931, o Universal Access to Quality Tertiary Education Act, bilang isang turning point sa pagsisigurong ang milyon-milyong mga estudyante ay makakapag-aral nang hindi kailangang gumastos nang malaki para sa tuition fee.

Aniya, ang pagsasabatas nito ay naging posible sa tulong ng principal author nito na si Senator Win Gatchalian, principal sponsor authors na sina, Senator Bam Aquino, dating Senator Alan Peter Cayetano na naging bahagi ng 17th Congress bago maging Kalihim ng Foreign Affairs, at Senate Majority Floor Leader Joel Villanueva na nagsilbing co-sponsor at co-author, at iba pa.

Iginiit ni Go na ang mga mambabatas na ito ay nakipaglaban upang masiguro ang pagpasa ng naturang panukala, na pinirmahan naman ni Pangulong Rodrigo Duterte para maging isang batas.

Inalala pa niya ang mainitang deliberasyon partikular ang pagtutol mula sa economic managers na nagpalutang ng fiscal concerns.

Malapit din aniya itong nai-veto ngunit sinabing mahalaga pa rin ang political will at naipanalo ito ng pagsisikap.

“Muntik na po itong na-veto dahil may concerns nga ang economic managers, pero alam po ni (CHED) Chairman Popoy de Vera yan, na ipinaglaban po natin ito until the last minute. Naalala ko noon, meron pong free scholarship din po sa Davao City noon, so sabi ko, kung nagawa ni Mayor Duterte noon sa Davao, eh bakit hindi niya gustong gawin sa buong Pilipinas. Ipinaglaban po natin ito hanggang sa hatinggabi na hindi po ma-veto kahit ayaw ng mga finance managers dahil sa kakulangan po sa pondo,” pag-alala ni Go.

“Finally, bilang Special Assistant to the President noon, na ipaglaban ito at ipaliwanag sa Pangulo along with the CHED, napirmahan po niya ito at naging batas ito,” dagdag pa niya.

Sa kabila nito, hindi pa rin aniya tapos ang trabaho at nananatiling suliranin ang access sa edukasyon lalo na sa mga estudyanteng naninirahan sa malalayo at liblib na lugar na walang public universities o colleges, o ang mga nais na programa ay hindi kasama sa nakatayo nang public institutions.

“Even with RA 10931 in place, we acknowledge that access to education can still be improved and expanded, especially for students in areas where public institutions either do not exist or do not offer the courses they wish to pursue. Persistent barriers may prevent many young Filipinos from fully realizing their academic aspirations, such as geographic isolation, limited program offerings, and resource constraints in public schools,” ani Go.

Dito na niya ipinunto ang paghahain ng Senate Bill No. 169, na naglalayong palawakin ang sakop ng Tertiary Education Subsidy (TES).

“I filed Senate Bill 169 by seeking to expand the Tertiary Education Subsidy or TES coverage. This measure proposes the inclusion of qualified poor students enrolled in private higher education institutions (HEIs) and TVIs, especially in localities where comparable programs are not offered by nearby public institutions. Lalong lalo na po yung mga nasa malalayong lugar, na wala pong state universities at colleges,” pagdedeklara ni Go.

Ipinaliwanag ni Go na ang SBN 19 ay magpapanukala rin ng isang voucher system na magbibigay-daan sa academically qualified ngunit economically disadvantaged students na ituloy ang pag-aaral sa isang pribadong paaralan para maabot ang kanilang nais na academic path.

Dapat din aniyang maipasa ang panukala sa lalong madaling panahon dahil sa nakakaalarmang datos ng droptout rate sa higher education.

Mula sa report ng Second Congressional Commission on Education (EDCOM 2), iginiit niya kung paanong ang economic realities ay nakakasira ng pangarap ng maraming mga estudyante.

“Sa pagbisita ko rin sa iba’t ibang kolehiyo sa bansa, napag-alaman namin na marami sa ating mga estudyante ngayon ang unang miyembro ng kanilang pamilya na nakatungtong sa kolehiyo. Bitbit nila ang pangarap na mabago ang tadhana ng kanilang mga pamilya. Ngunit nakakalungkot pong malaman na ang national dropout rate ng bansa sa higher education ay umabot na po sa 39%, as recently reported by the Second Congressional Commission on Education or EDCOM 2. Ang karaniwang dahilan ay ang kakulangan sa pangtustos sa araw-araw na pamasahe at iba pang gastusin,” paliwanag ni Go.

Nagpaalala rin ang senador sa mga kasamahan nito na ang youth empowerment sa pamamagitan ng edukasyon ay nananatiling mahalaga sa pag-unlad ng bansa.

“Mr. Chair, as Dr. Jose Rizal once said, ‘Ang kabataan ang pag-asa ng bayan.’ At parati kong sinasabi yan bilang Chairman ng Senate Committee on Youth. Yung edukasyon po ay puhunan natin hanggang sa pagtanda natin, hindi po ito nawawala. If we fail to support them in finishing their education, we risk failing not just these students, but also the future of our nation,” sinabi pa ni Go.

Dahil dito ay nangako siya ng patuloy na suporta sa government scholarship programs at iba pang inisyatibo na nagpapaunlad ng inclusivity.

“Para maipagpatuloy ng mga kabataan, lalo na po ng mga mahihirap ang kanilang pag-aaral, sinusuportahan po natin ang scholarship programs ng gobyerno. Tumutugon ito sa misyon natin na mapagkalooban sila ng inclusive and quality education,” aniya. RNT