MANILA, Philippines – Inamin ni dating Department of Public Works and Highways (DPWH) district engineer Henry Alcantara ang pag-isyu ng completion certificates sa “ghost” flood control projects sa Bulacan nang walang personal na pag inspeksyon sa mga mismong site ng konstruksiyon.
Sa unang hearing ng House of Representatives tri-committee sa maanomalyang flood control projects sa bansa, si dating Bulacan first district engineer Henry Alcantara ay umamin kay Deputy Speaker at Zambales Rep. Jay Khonghun na mayroon siyang kapabayaan sa pagsisiyasat sa mga proyektong naka ilalim sa kanyang superbisyon.
“Do you believe you are responsible for the ghost projects in your area?” tanong ni Khonghun.
“Yes, your Honor,” sagot ni Alcantara.
Bilang district engineer, maraming inaprubahang flood control projects sa kanyang lugar si Alcantara, kasama na dito ang P55-million reinforced concrete river wall na proyekto sa Barangay Piel sa Baliuag na iginawad sa SYMS Construction Trading.
Ipinag-utos ni dating Public Works Secretary Manuel Bonoan na suspindihin si Alcantara habang nakabinbin ang imbestigasyon sa umano’y mga ghost project sa kanyang lugar.
Isinaad din ni Alcantara sa panel co-chair at Manila Rep. Joel Chua na ipinapalagay lamang niya na regular ang mga dokumentong isinumite sa kanya para sa pagpirma.
“So you have not looked at a single project? [You] don’t look at every single project that goes through your office?” mariing tanong ni Chua.
“Your honor, I don’t…[there] are simply too many documents that go through my office every day. I do inspections, but not every single one,” ani Alcantara.
Matatandaang personal na inispeksyon ni Pangulong Ferdinand Marcos Jr. noong Agosto 20 ang river wall na proyekto sa Barangay Piel sa Baliuag at nadismaya ito nang malaman na ang proyekto ay ‘nonexistent’ kahit na binayaran na ito ng gobyerno ng P43.4 million at P5.9 million sa SYMS.
Bukod sa proyekto sa Baliuag, binaggit din ni Chua ang isa pang substandard na proyektong inispeksyon ng Pangulo sa Bulusan, Calumpit na nagkakahalagang P94.6 million river protection structure na iginawad naman sa St. Timothy Construction Company na siya ding iparubahan ni Alcantara.
Gayundin ang flood mitigation structure sa Calumpit na may halagang P74.6 million na iginawad sa Wawao Builders. RNT/MND
