MANILA, Philippines – Kinumpirma nitong Lunes ni Department of Justice (DOJ) Secretary Jesus Crispin Remulla na pumayag si dating Philippine Charity and Sweepstakes Office (PCSO) general manager Royina Garma na maging testigo para sa prosekusyon laban kay dating Pangulong Rodrigo R. Duterte sa International Criminal Court (ICC).
Sinabi ni Remulla na lumipad si Garma patungong Malaysia bilang turista matapos dumating sa Pilipinas noong Linggo ng gabi. Siya ay ipinatapon mula sa Estados Unidos nang tinanggihan ang kanyang kahilingan para sa political asylum.
Ayon kay Remulla, nagtungo si Garma sa Malaysia upang makipagpulong sa ICC. Aniya, ang pinakamahusay na paraan upang maprotektahan si Garma, na isang dating police colonel, ay ang makipagkita siya sa mga opisyal ng ICC sa ibang bansa dahil posibleng malagay sa panganib ang kanyang buhay sa Pilipinas.
Sa mga pagdinig noong nakaraang taon ng House of Representatives Quad Committee on the Duterte drug war, inilahad ni Garma na hiniling sa kanya ng dating pangulo na maghanap ng opisyal na magpapatupad ng “modelo ng Davao” ng drug war sa pambansang saklaw.
Ayon kay Garma, ang modelo ng Davao ay tumutukoy sa isang “sistema na kinasasangkutan ng mga pagbabayad at gantimpala.”
Dagdag pa ni Remulla, pinadali ni dating senador Antonio Trillanes IV ang pakikipag-ugnayan ni Garma sa ICC, na nakatakdang magsagawa ng pagdinig para sa confirmation of charges laban kay Duterte sa huling bahagi ng buwang ito.
Gayunman, nilinaw ni Remulla na ang pakikipagtulungan ni Garma sa ICC ay hindi nangangahulugan na hindi na siya mananagot sa iba pang mga kasong kinasasangkutan niya.
Noong Pebrero, nagsampa ng kasong murder at frustrated murder ang National Bureau of Investigation (NBI) laban kay Garma kaugnay ng umano’y pagkakasangkot niya sa pagkamatay ni PCSO board secretary Wesley Barayuga noong 2020. (Jocelyn Tabangcura-Domenden)
