MANILA, Philippines – Hindi pa ‘safe’ sina Senador Joel Villanueva at Jinggoy Estrada sa isyu ng budget insertions.
Ito ay sa kabila ng pagharap sa nag-aakusa sa kanilang dalawa sa pagdinig ng Senate blue ribbon committee nitong Huwebes, Setyembre 18 kaugnay sa mga anomalya sa flood control project, ayon kay Senate President Pro Tempore Panfilo “Ping” Lacson.
Sina Villanueva at Estrada ay idinidiin sa alegasyon ni Brice Hernandez, dating assistant district engineer ng Department of Public Works and Highways.
Inakusahan ni Hernandez ang dalawang senador na nakikialam sa paglalaan ng P600 milyon at P355 milyong pondo para sa proyekto sa unang distrito ng Bulacan kapalit ang 30 percent na cut.
Itinanggi naman ng dalawa ang akusasyon at sinabing pipirma sila ng waiver para buksan ang kanilang mga bank account.
Sa pagdinig ng Senado, sinabi ni Lacson na may nakita siyang “seven or eight items” sa ilalim ng unprogrammed fund ng 2023 national budget sa kabuuang P600 milyon.
Nauna na niyang sinabi na may kabuuang P355 milyong flood control project insertions ang nakita rin sa 2025 national budget.
“By any measure, Senators Villanueva and Estrada have not been cleared, at least on the issue of budget insertions involving infrastructure projects in Bulacan worth P600M and P355M respectively, as alleged by Engr Brice Hernandez,” tugon ni Lacson.
Sumagot din si Lacson sa mga pagtutol sa pagdalo ni Villanueva at Estrada sa pagdinig na nag-iimbestiga sa alegasyon laban sa kanila.
“No ‘investigation’ can be credible if two of the people who should be investigated are there, grilling witnesses and making self-serving statements aimed at exonerating them,” ayon kay Barry Gutierrez, dating tagapagsalita ni dating Bise Presidente Leni Robredo.
“It is a person’s basic right to confront his accuser. In case you didn’t notice, I did not clear the two senators on the issue of budget insertions [because] the budget books validate Brice Hernandez’s allegations based on my own staff’s research, at least in the case of Sen Estrada,” paliwanag ni Lacson. RNT/JGC
