ER ng Ospital ng Sampaloc, 3-buwang isasailalim sa rehab

MANILA, Philippines – PANSAMANTALANG isasara ang emergency room ng Ospital ng Sampaloc sa lungsod ng Maynila upang bigyang-daan ang tatlong buwang rehabilitasyon nito para sa mas maayos na pagbibigay ng serbisyong medikal sa publiko, partikular na sa mga Manilenyo.

Pinangunahan nina Manila Mayor Isko Moreno Domagoso, Vice Mayor Chi Atienza at 4th District Congresswoman Giselle Maceda ang groundbreaking ceremony para sa gagawing pagkukumpuni ng emergency room na pangangasiwaan ni City Engineer Armand Andres.

Kabilang sa mga pagbabagong isasagawa ay ang pagkakaroon ng siyam na bed capacity, resuscitation bay, centralized medical gas system, centralized airconditioning system, surgery room, triage and admitting area, minor operation room, nurse’s station, observation ambulatory, decontamination area, treatment room, equipment and supply storage room, medication preparation area, staff toilet, all-gender/PWD washroom, improved entrance lobby and waiting area, at improved roofing area.

Sa talumpati ni Yorme, nabanggit nito na napasugod siya sa nasabing ospital kahit maghahatinggabi at bumubuhos ang ulan upang suriin ang natanggap na reklamo kaugnay sa kaawa-awang kalagayan ng mga pasyente sa emergency room.

“May mga report sa akin, gumanda raw ang Ospital ng Sampaloc, sa sobrang ganda, ospital na, resort pa,” ani Domagoso.

“Hindi ako makapaniwala kasi yung pinalitan ko (dating mayor) doktora eh, I would think it was fully attended,” giit ng alkalde.

Aniya, agad niyang binalikan ang Ospital ng Sampaloc kinabukasan kasama si City Engineer Armand Andres at mga tauhan nito upang makipag-ugnayan kay Dr. Angel Erich Sison, ang director ng Ospital ng Sampaloc, para sa pagkukumpuni ng emergency room at kung ano pa ang mga kinakailangang gawin.

Tiniyak naman ni Yorme na tatapusin sa loob ng tatlong buwan ang pagkukumpuni upang maging masaya ang Pasko sa Ospital ng Sampaloc.

“Nakagawa nga kami ng ospital na almost 400-bed in 52 days from vacant lot, without engineering playbook, hula-hula lang, nayari namin and it became the focal health care facility of the City of Manila and the national government. Kaya-kaya ‘yan, hindi imposible,” dagdag pa ng alkalde.

Aminado naman si Yorme Isko na hindi pa sapat ang kasalukuyang hawak na pondo ng lungsod, subalit ginawan nila ng paraan na maisailalim agad sa rehabilitasyon ang nabanggit na ospital dahil bahagi ito ng kanilang polisiya at pananaw, kasama ang bise alkalde Chi Atienza, na isulong ang minimum basic needs gaya ng pabahay, edukasyon, pangangalaga sa kalusugan at trabaho para sa mga Manilenyo.

Nabatid na habang isinasagawa ang nasabing rehabilitasyon, tanging mga outpatient patient muna ang tatanggapin ng Ospital ng Sampaloc at pansamantalang hindi sila tatanggap ng pasyente sa kanilang emergency room.

(JAY Reyes)