MANILA, Philippines – Napaulat na nangungunang contender para sa chairmanship ng Senate Blue Ribbon Committee si Senador Francis “Kiko” Pangilinan matapos ipahayag ni Senate President Pro Tempore Panfilo “Ping” Lacson ang kanyang desisyon na bumaba sa puwesto habang nagpapatuloy ang imbestigasyon ng panel sa multibillion-peso flood control fund scam.
Seryosong pinag-iisipan ang usapin ng hahalili kay Lacson dahil sa imbestigasyon ng mga maanomalyang flood control projects na kinasangkutan ng mga mambabatas na napaulat na nakinabang sa mga proyektong pang-imprastraktura ng gobyerno.
Ang Blue Ribbon Committee, na nag-iimbestiga sa katiwalian ng gobyerno at maling paggamit ng pampublikong pondo, ay nagkaroon na ng dalawang tagapangulo mula nang magsimula ang 20th Congress noong Hulyo. Kinuha ni Lacson ang puwesto matapos maging Senate President si Senador Vicente Sotto III, kapalit ni Senator Rodante Marcoleta.
Inanunsyo ni Lacson noong Linggo (Oktubre 5) na siya ay bababa sa makapangyarihang puwesto matapos malaman na ilan sa kanyang mga kasamahan ay hindi nasisiyahan sa kanyang paghawak sa imbestigasyon sa flood control.
“Since all chairpersons of the Senate committees are elected by our peers, I serve at the pleasure of my colleagues, particularly the members of the majority,” aniya.
“Rightly or wrongly, when quite a number of them have expressed disappointment over how I’m handling the flood control project anomalies, I thought it’s time for me to step aside in favor of another member who they think can handle the committee better,” dagdag niya. RNT/MND
