54 pamilya sa Pasig, nabigyan ng pabahay ng NHA

MANILA, Philippines – agbigay ang National Housing Authority (NHA) ng Certificates of Unit Allocation (CUAs) sa 54 pamilya sa isinagawang inauguration ng Manggahan Residences Phase 3B sa Brgy. Sta. Lucia, Pasig City.

Pinangunahan ni Ar. Monn Alexander Ong, NCR East Sector Officer-in-Charge, ang pamamahagi bilang kinatawan ni NHA General Manager Joeben A. Tai.

Ang proyektong pabahay, na sumasakop sa 1,450 square meters at may mga unit na 24 square meters bawat isa, ay para sa mga pamilyang nakatira sa kahabaan ng Manggahan Floodway at iba pang delikadong lugar sa Pasig.

Ang mga benepisyaryo ay masusing sinuri at napatunayan sa pamamagitan ng Local Inter-Agency Committee (LIAC) at Beneficiary Selection, Awards, and Arbitration Committee (BSAAC) mula pa noong 2018.

“Ang NHA po, sa ilalim ng aking pamumuno at alinsunod sa direktiba ng ating mahal na Pangulong Ferdinand ‘Bongbong’ R. Marcos, Jr., at adhikain ng Expanded Pambansang Pabahay Para sa Pilipino (Expanded 4PH) Program… ay nagsusumikap na tulungan ang mga nangangailangan nating mga kababayan na matupad ang kanilang pangarap na magkaroon ng bahay sa abot-kayang pamamaraan sa ligtas na komunidad,” ani GM Tai.

Nagpasalamat naman ang mga benepisyaryo. “Nais ko lang pong pasalamatan ang ating Pangulong BBM at ang pamunuan ng NHA sa pagbibigay po sa amin ng mga certificates na ito dahil ito po ay mga susi namin para sa pagsasaayos po ng aming buhay,” sabi ni Miguelita Borromeo, isa sa mga benepisyaryo.

Tiniyak ni GM Tai na matatapos ang mga gusali upang ang lahat ng kwalipikadong benepisyaryo ay makalipat sa ligtas at de-kalidad na mga tahanan. Dumalo rin sa seremonya si Pasig City Vice Mayor Robert Jaworski Jr. at iba pang kinatawan ng lokal na pamahalaan. RNT