MANILA, Philippines – Malugod na tinatanggap ng Department of Social Welfare and Development (DSWD) ang bagong batas na nagbibigay ng libreng serbisyo sa libing para sa mga mahihirap na mamamayan.
“Tatalima kami doon sa bagong batas, magandang batas ‘yan. At talagang i-earmark natin ‘yung pondo na para diyan. Ihihiwalay na natin siya para within the AICS (Assistance to Individuals in Crisis Situation) program, talagang may naka-earmark na pondo para sa free funeral service,” sinabi ni DSWD Secretary Rex Gatchalian nitong Miyerkules, Oktubre 15.
Ayon sa DSWD, habang ang mga local government units (LGUs) ay nagbibigay din ng burial assistance sa kanilang mga nasasakupan, binigyang-diin ni Secretary Gatchalian na ang batas ay makakatulong sa pagpapalaki ng pagbibigay ng social welfare assistance sa mga indigent constituents.
“Ang social welfare devolved naman talaga ‘yan. Pero alam rin natin na maliliit ang ating local government units; minsan hindi nila kayang sagutin lahat,” sabi ng DSWD chief.
Sa ilalim ng Republic Act. 12309 o ang Free Funeral Services Act, na naging batas noong Setyembre 28, sasagutin ng DSWD ang funeral package ng mga mahihirap na pamilya o yaong “hindi makapagsustento o makapagbigay ng kanilang minimum na pangunahing pangangailangan ng pagkain, kalusugan, edukasyon, pabahay o iba pang mahahalagang amenities. Santi Celario
