MANILA, Philippines – Nakatakdang magtungo si dating Bulacan 1st district engineer Henry Alcantara sa Office of the Ombudsman bilang bahagi ng imbestigasyon sa maanomalyang flood control projects.
Ito ang kinumpirma ni Assistant Ombudsman Mico Clavano sa mga miyembro ng media bago ang deliberasyon ng Senate Committee on Finance sa proposed P6.390 bilyong badyet ng Office of the Ombudsman para sa 2026.
Sinabi ni Clavano na una nang humarap si dating Bulacan 1st assistant district engineer Brice Hernandez sa mga imbestigador ng Ombudsman nitong Huwebes.
“Brice Hernandez was in the Ombudsman yesterday for fact finding. So he was met by investigators of the FIO (field investigation office) and today, Alcantara is there,” aniya.
Nitong Biyernes ng umaga, nakita si Hernandez na dinala sa holding room ng Senado sa hindi pa matukoy na dahilan.
Kasalukuyang naka-detain sina Hernandez at Alcantara sa Senado matapos ma-cite in contempt ng Senate blue ribbon committee.
Nang tanungin kung si Hernandez ay humingi ng tulong sa Ombudsman na mailabas sa Senate detention, sinabi ni Clavano na “Nung DOJ (Department of Justice) kami po, ganon na ‘yung request niya.”
Ang mga dating engineer ng Department of Public Works and Highways (DPWH), kabilang ang mga contractor na sina Curlee at Sarah Disacaya, ay kasalukuyang ikinokonsidera bilang protected witnesses sa ilalim ng DOJ Witness Protection Program. RNT/JGC
