Nilinaw ng Alphaland Baguio Mountain Lodges (ABML) na walang pag-aari o bahay si Senador Francis “Chiz” Escudero sa loob ng kanilang high-end residential development sa Itogon, Benguet.
Sa isang pahayag na ipinadala sa pamamagitan ng text, sinabi ng pamunuan ng ABML na bagama’t hindi nila isinasapubliko ang listahan ng kanilang mga residente dahil sa privacy at security reasons, nakumpirma nilang walang bahay na nakarehistro sa pangalan ng senador o ng anumang kumpanyang konektado sa kanya.
“ABML, like any other residential village in the country, does not divulge a list of its residents or homeowners. However, we are able to confirm that there is no home listed as owned by Sen. Chiz Escudero or any company associated with him,” ayon sa pamunuan ng ABML.
Dagdag pa ng opisyal, madalas lamang bumisita si Escudero at ang kanyang pamilya sa nasabing property, bagay na makikita rin sa ilang social media posts ng iba’t ibang indibidwal, ngunit hindi ito nangangahulugang may pag-aari siya roon.
“We are aware that he and his family are occasional visitors to the property, as can be gleaned from numerous social media posts by various parties. Mrs. Escudero, being a long-time member of Alphaland Balesin Island Club, is allowed the privilege to use the facilities of ABML,” dagdag ng opisyal.
Ang Alphaland Baguio Mountain Lodges ay isang exclusive mountain residential project ng Alphaland Corporation, na kilala sa kanilang mga luxury lodges na may magagandang tanawin. Sister property ito ng Alphaland Balesin Island Club sa Quezon province.
Batay sa 2024 Statement of Assets, Liabilities, and Net Worth (SALN) ni Escudero, wala siyang idineklarang pag-aari o interes sa Alphaland o anumang real estate sa Baguio o Benguet. RNT
