MANILA, Philippines – Plano ng Department of Transportation (DOTr) na maglagay ng mga undercover inspector sa mga pangunahing sistema ng tren upang masuri ang karanasan ng mga commuter at patunayan ang progreso ng mga pagbuti sa mga estasyon ng tren. Aasahan na saklaw nito ang LRT-2, MRT-3, at PNR.
Layunin nito na matiyak na tunay na naipapatupad ang mga ipinangakong pagbuti, hindi lamang sa papel kundi sa pang-araw-araw na buhay ng mga pasahero.
Ang hakbang ay matapos ang isinagawang surprise inspection ni DOTr Secretary Giovanni Lopez sa LRT-1 Baclaran Station, kung saan nakita ang “marumi” at “napabayaan” na kalagayan ng mga pasilidad, kaya’t pinagalitan niya ang station manager.
Samantala, kinondena naman ng mga unyon ng mga manggagawa—ang National Federation of Labor Chapter 001-LRMC Supervisory Union at ang National Federation of Labor Chapter 003-Light Rail Manila Corporation Rank and File Union—ang aksyon ni Lopez, na sinabing hindi naging patas para sa ordinaryong empleyado na sisihin sa problema na hindi niya kontrolado.
Pero ayon sa DOTr, hindi pinahiya ni Lopez ang station manager, kundi nagmula sa “pagkadismaya at tunay na pag-aalala sa kapakanan ng mga commuter.”
Samantala, nangako ang Light Rail Manila Corporation na pabilisin ang mga pag-upgrade sa Baclaran Station, na malugod na tinanggap ni Lopez. Jocelyn Tabangcura-Domenden
