MANILA, Philippines – Naghain si Senador Raffy Tulfo ng panukalang magtatatag ng hiwalay na quasi-judicial body na hahawak sa mga labor dispute sangkot ang overseas Filipino workers (OFWs).
Inihain ni Tulfo, chair ng Senate committee on migrant workers, ang Senate Bill (SB) No. 1480, na layong lumikha ng Migrant Workers Relations Commission (MWRC) na magpapabilis sa pagresolba sa mga reklamo ng mga OFW.
Ang hiwalay na korte ay tutulong sa mga OFW “avoid the prolonged procedures commonly associated with the NLRC (National Labor Relations Commission) in their quest for justice,” ayon pa sa senador.
Kasalukuyang hawak ng NLRC, isang quasi-judicial agency sa ilalim ng Department of Labor and Employment (DOLE), ang labor at management disputes sangkot ang local at overseas workers.
“The NLRC processes over 30,000 cases each year, making OFW cases especially susceptible to delays and backlogs,” saad sa explanatory note ni Tulfo para sa SB 1480.
Sinabi niya na habang ang NLRC ay “well-established and vital organization,” ang malawak na mandato nito para sa domestic at migrant workers ay nag-ambag sa maraming caseloads.
“Reports indicate that this large volume of cases has caused considerable delays, adversely affecting OFWs in their pursuit of justice,” sinabi pa ni Tulfo.
Sa ilalim ng SB 1480, ang MWRC ay magkakaroon ng exclusive jurisdiction sa lahat ng kaso sangkot ang Filipino migrant workers, land-based man at sea-based, sila man ay sakop ng collective bargaining agreements.
Ito ay isasama sa Department of Migrant Workers (DMW) para sa policy coordination.
Bubuuin ito ng tatlong dibisyon na magkakaroon din ng tatlong commissioner.
Ang bawat division ay pangungunahan ng presiding commissioner mula sa public sector, ang isang commissioner ay inonomina ng migrant workers, at ang isa pa ay sa pamamagitan ng private recruitment at manning agencies. RNT/JGC
