Goitia kay Zaldy Co: Walang ebidensya, puro ingay

MANILA, Philippines – BINIGYANG diin ni Chairman Emeritus Dr. Jose Antonio Goitia na katotohanan at ebidensya ang dapat pagbatayan ng publiko matapos ang mga inilabas na paratang ni Zaldy Co kung saan malinaw na wala itong naipapakitang ebidensyang nag-uugnay kay Pangulong Bongbong Marcos sa sinasabing P100 bilyong insertion.

Ayon kay Goitia, ang mga dokumentong ipinakita ni Co ay karaniwang listahan ng proyekto at pondo sa pambansang budget, ngunit wala itong anumang pahiwatig o utos mula sa Malacanang na nagsasabing idinagdag ang mga ito ayon sa kagustuhan ng Pangulo.

Nabatid pa kay Goitia na may isang national security assessment ang nag-ulat na ang timing ng pahayag ni Co ay sumasabay sa mga planong kilos-protesta ng ilang grupong kritikal sa administrasyon. Aniya, ayon sa mga analyst, posible itong maging bahagi ng mas malawak na pagtatangka na guluhin ang pamahalaan sa pamamagitan ng pagbuo ng mga nakaliligaw na naratibo laban sa Pangulo at gobyerno.

Ayon kay Goitia, sa halip na humarap sa Senado o magbigay ng sinumpaang salaysay, piniling sa ibang bansa ilabas ni Co ang kanyang mga akusasyon — dahilan upang umusbong ang seryosong pagdududa sa kanyang layunin.

Aniya, ang mga pahayag na inilalabas nang hindi hinaharap ang mga tanong o imbestigasyon ay nag-iiwan ng mas maraming katanungan, lalo na’t gumagana ang lahat ng legal na proseso sa Pilipinas.

Itinuro rin ni Goitia ang isang malinaw na rekord na sumasalungat sa mga akusasyon ni Co at ito ay ang pag-Veto ni Pangulong Marcos Jr. sa P194 bilyon na item sa 2025 national budget.

“Ang pag-veto ng halos P200 bilyong budget item ay malinaw na nagpapakita na hindi pinoprotektahan ng Pangulo ang anumang kuwestiyonableng insertion,” ani Goitia.

“Ipinapakita lamang nito na ang Pangulo ay nagtatanggal ng mga item na may duda, hindi nagdaragdag ng mga ito. Dahil dito, malinaw na walang basehan ang paratang na lihim siyang naglalagay ng anumang iregular na alokasyon,” dagdag pa ni Goitia.

Binigyang-diin pa ni Goitia ang mga hindi tugma sa salaysay ni Co — isa na rito ay mismong si Pangulong Marcos Jr. ang naglantad ng mga iregularidad sa flood control projects at nag-utos ng mas malalim na imbestigasyon.

Aniya, ipinapakita lamang nito ang kakulangan ng basehan at pundasyon sa mga pahayag ni Co.

Binanggit din ni Goitia na patuloy na pinapalakas ng administrasyon ang transparency at accountability sa pamahalaan.

“Ang nakikita ko ay isang pamahalaang pinapalakas ang checks and balances, hindi pinahihina ang mga ito,” ani Goitia.

“Hindi mo maaaring pekein ang reporma sa institusyon. Maisasagawa mo lamang ito kung tapat kang nakatuon sa pag-aayos ng Sistema,” ayon pa kay Goitia.

Maaring magbukas ng diskusyon ang mga pahayag ni Co — ngunit hindi sapat ang diskusyon upang maging ebidensya.

Pahayag pa ni Goitia, ang mamamayan ay nararapat sa talakayang nakabatay sa nasusuri at napatutunayang impormasyon, hindi sa mga pahayag na inilalabas mula sa ibayong dagat o sa mga pagkakataon na halatang ginagamit upang manipulahin ang pulso ng publiko.

At gaya ng paalala ni Goitia, katotohanan ang dapat manaig, hindi ingay. Sa gitna ng lahat, nananatiling nakasandig ang administrasyong Marcos sa responsableng pamamahala, transparency, at mga programang may tunay na ambag sa ikabubuti ng bansa.

Si Dr. Jose Antonio Goitia ay kinikilala bilang Chairman Emeritus ng apat na makabayang at sibikong organisasyon: Alyansa ng Bantay sa Kapayapaan at Demokrasya (ABKD), People’s Alliance for Democracy and Reforms (PADER), Liga Independencia Pilipinas (LIPI), at Filipinos Do Not Yield (FDNY) Movement. RNT