MANILA, Philippines – Nagkaloob ang Philippine Drug Enforcement Agency (PDEA) ng kabuuang ₱16,114,640.90 na cash rewards sa 19 civilian informants noong Nobyembre 28, 2025 sa ilalim ng Operation: Private Eye (OPE) — isang programang humihikayat sa mga ordinaryong mamamayan na tumulong laban sa ilegal na droga.
Sa PDEA National Office sa Quezon City, walong informant ang personal na tumanggap ng kanilang gantimpala habang nakatago ang kanilang pagkakakilanlan para sa kaligtasan nila. Ang iba pang informants mula sa mga rehiyon ay tumanggap ng kanilang insentibo sa kani-kanilang PDEA Regional Offices.
Dumalo bilang Guest of Honor at Speaker ang DDB Chairman Secretary Oscar F. Valenzuela, na nagpahayag ng taos-pusong pasasalamat sa mga awardees dahil sa kanilang tapang at dedikasyon. Binanggit niya na ang kanilang sakripisyo ay may malaking papel sa pagprotekta ng mga komunidad mula sa banta ng ilegal na droga.
Ayon kay Secretary Valenzuela: “Saludo kami sa ating mga partners, informants, at law enforcers. Ang inyong tapang at determinasyon ay nagpoprotekta sa ating mga kababayan at nagpapalakas sa ating pambansang laban.”
Idiniin din niya na ang laban kontra droga ay nangangailangan ng whole-of-nation approach, at dapat nakabatay sa paggalang sa karapatang pantao, public health, at kaligtasan ng publiko.
Ayon kay PDEA Director General Undersecretary Isagani R. Nerez, ang mga informant ay nagbigay ng datos na nagbunsod sa 22 high-impact anti-drug operations, nakapagwasak ng drug networks, at nakahuli ng mga high-value drug personalities.
Pitong informant ang tumanggap ng tig-₱2,000,000 matapos makapagbigay ng impormasyon para sa malalaking operasyon na ito:
Malalaking Operasyon at Droga na Nakumpiska
May 26, 2025 – Angeles City, Pampanga
• Search warrant operation
• 110,919.51 grams ng shabu
June 20, 2025 – Subic, Zambales (coastal interdiction)
• 1,484,727.80 grams ng shabu
August 12, 2025 – San Pablo City, Laguna
• Buy-bust operation
• 19,678.30 grams ng shabu
August 31, 2025 – Rio Hondo, Zamboanga City
• Special anti-drug operation
• 89,000 grams ng shabu
September 16, 2025 – Port of Batangas, Batangas City
• Interdiction operation
• 39,826.70 grams ng shabu
October 2, 2025 – Olongapo-Bugallon Road, Pangasinan
• Buy-bust operation
• 125,000 grams ng shabu
October 3, 2025 – Brgy. Laois, Labrador, Pangasinan
• Search warrant operation
• 894,495.90 grams ng shabu
Sinabi ni DG Nerez na ang bawat matagumpay na operasyon ay dahil may mamamayang hindi pumikit at hindi lumayo sa problema. Ang impormasyon na ibinigay nila ay “halos imposibleng makuha ng law enforcement kung sila lang.”
Ayon sa PDEA, bilang bahagi ng Bagong Pilipinas vision, ang laban kontra droga ay hindi na lang trabaho ng pamahalaan—kailangan ang sama-samang pagkilos ng bawat Pilipino.
Hinihikayat ng PDEA ang publiko na magsumbong ng ilegal na aktibidad sa OPE hotline: 0917-867-7332.
Pahayag ng Director General: “Stand with us. Ang bawat impormasyon ay nagpapalakas sa ating kolektibong depensa. Kapag ang mga mamamayan ay mapagmatyag at matapang, mas ligtas ang ating Bagong Pilipinas.” DANNY QUERUBIN
